Kólik mınıstri: Pılotsyz taksıde alǵashqy kezeńde júrgizýshi báribir bolady

ASTANA. KAZINFORM — Kólik mınıstri Nurlan Saýranbaev Úkimet otyrysynan keıin ótken baspasóz máslıhatynda pılotsyz taksı jobasy qalaı iske asatynyn aıtty.

— 2027 jyly alǵashqy pılotsyz júk kólikterin iske qosý josparda bar. Al pılotsyz taksı qyzmetine kelsek, joba josparda bar. Zań jobasynda pılotsyz taksımen birge aerotaksı máselesin de qarastyrǵanbyz. Kelesi jyly ol qujatty Parlamentke engizemiz. Biz zaman kóshinen qalmaýǵa, jańa tehnologııalardy Qazaqstan aýmaǵynda da qoldanýǵa tyrysamyz, — dedi ol.

Mınıstrdiń sózinshe, pılotsyz taksı jobasynda qytaı tájirıbesi basshylyqqa alynatynyn aıtty.

— Bul jerde birinshi kezekte qaýipsizdik máselesi bar. Qaýipsiz bolsa, másele sheshiledi. 2027 jyly pılotsyz júk kólikterin engizý josparda bar. Al pılotsyz taksıdiń paıda bolýy da tolyqqandy múmkin dep oılaımyn. Álemde qoldanylyp júr ǵoı. Tek bul jerde shekteýler bar. Mysaly biz Qytaıdyń Shenchjen qalasynda boldyq. Olarda pılotsyz taksıge ruqsat etilgen. Biraq ázirshe ishinde júrgizýshi birge otyrady. Bizde de dál osylaı birtindep alǵa jyljıtyn shyǵarmyz. Onyń bári jolaýshynyń qaýipsizdigi úshin jasalady, — dedi Nurlan Saýranbaev.

Buǵan deıin qazaqstandyq Jet Sharing kompanııasy pılotsyz taksı jobasyn iske qosýǵa nıetti ekenin málimdegen bolatyn. 

Sonymen qatar kólik mınıstri Nurlan Saýranbaev joldardyń tsıfrlyq pasportyn jasaý ne úshin qajet bolǵanyn aıtty.