Kólik mınıstri «QTJ» basshysyn otstavkaǵa jiberý týraly usynysqa pikir bildirdi

Úkimet otyrysynan keıin ótip jatqan baspasóz konferentsııasynda Kólik mınıstri Marat Qarabaev «Qazaqstan temirjoly» ulttyq kompanııasynyń basqarma tóraǵasy Nurlan Saýranbaevty otstavkaǵa jiberý týraly usynysqa pikir bildirdi, dep habarlaıdy Kazinform. 

«Siz temirjol salasynyń eki jyldaǵy jaǵdaıyn nemen baǵalap otyrsyz? Jalpy bıyl tasymal kólemi 5 paıyz ósti. Tranzıt kólemi bıyldyń ózinde 25 mln tonnaǵa jetkenin aıttym. Ósim 20 paıyz deńgeıinde bolyp tur. «QTJ»-da bar problemalar jyldar boıy qordalanǵan. Sondyqtan «QTJ» ulttyq operatory mınıstrlikpen birge sharalar qabyldap jatyr. Ol týraly siz jaqsy bilesiz dep topshylaımyn. Buǵan deıin de bizdegi júk vagon parkiniń tozý kórsetkishi 60 paıyzdan asqanyn birneshe ret aıttyq. Sondyqtan bıyl 3 myń jańa vagon satyp alý týraly kelisim bekitilgen. Jolaýshy vagondarynyń tozý kórsetkishi 50 paıyzdan asqanyn aıttyq. Sondyqtan bıyl 64 jolaýshy parkin satyp aldyq. Lokomotıvter de tozǵan. Ony joqqa shyǵaryp otyrǵan joqpyn. Jazda problemalar boldy. Biraq bul tranzıt emes, eksporttyń kólemderimen baılanysty. Sondyqtan bıyl 114 lokomotıv satyp aldyq», - dedi mınıstr.

Onyń paıymynsha, másele qadam-qadammen sheshilip jatyr.

«Kólik mınıstri retinde N.Saýranbaevtyń jumysyn «jaqsy» dep baǵalaısyz ba?», - dep surady jýrnalıst.

«Men Kólik mınıstrliginiń basshysy retinde Qazaqstandaǵy temirjoldardyń qyzmetindegi problemalar jyldar boıy qordalanǵan jáne qadam-qadammen sheshilip jatyr dep baǵalaımyn», - dedi Marat Qarabaev.