Kólik mınıstri eldegi jol apattarynyń basty sebebin atady
ASTANA. KAZINFORM — Qazaqstanda jol-kólik oqıǵalarynyń negizgi sebebi — jyldamdyqty asyrý. Kólik mınıstri Nurlan Saýranbaev jol qaýipsizdigin arttyrý boıynsha qandaı jumystar qolǵa alynǵanyn aıtty.
Bıyl respýblıkalyq joldarda jol-kólik oqıǵalary 10%-ǵa, qaza bolǵandar sany 14%-ǵa, zardap shekkender 11%-ǵa tómendegen.
— Apattyń negizgi sebebi — júrgizýshilerdiń erejeni saqtamaýy. Jol apatynyń negizgi faktorlaryn qarasaq, 35% — jyldamdyqty asyrý, 12% — ara qashyqtyqty saqtamaý, 11% — kólikti basqara almaý jáne 8% — qarsy jolǵa shyǵý, — dedi mınıstr Úkimettiń búgingi otyrysynda.
Kólik mınıstrligi Іshki ister mınıstrligimen birlesip, jol apatyn boldyrmaý úshin birqatar jumysty qolǵa alǵan.
— Birinshiden, jyldamdyqty asyrý — apattyń negizgi sebebi. Sondyqtan, ortasha jyldamdyqqa erekshe kóńil bólinip otyr. Qazir bul joba 2,8 myń shaqyrym aqyly joldarda jumys istep tur. Sonyń arqasynda apat sany 10%-ǵa azaıdy. Jobany búkil respýblıkalyq jáne jergilikti joldarǵa engizýge kiristik, — dedi Nurlan Saýranbaev.
Sonymen birge, respýblıkalyq joldardyń 11 myń shaqyrymynan astamy (búkil joldyń 45%-y) I jáne II tehnıkalyq sanatqa aýystyryldy. Nátıjesinde qarsy baǵyttaǵy soqtyǵysý qaýpi azaıdy.
— Tranzıttik kólikter eldi mekenderdi aınalyp ótetin 65 jol salyndy. Kólik pen adam júretin joldy bólý úshin 38 jaıaý júrginshiler ótkeli salyndy. Qarsy baǵyttaǵy kólik aǵyndaryn bólý úshin 1,5 myń shaqyrym jol jóndelip jatyr, — dedi Nurlan Saýranbaev.
Buǵan deıin Energetıka mınıstri Erlan Aqkenjenov óńirlerdiń jylytý maýsymyna daıyndyǵy men jańǵyrtý jumystary týraly baıandaǵan edi.
