Kólik mınıstri burynǵy orynbasarynyń ustalýyna qatysty pikir aıtty

ASTANA. KAZINFORM — Kólik mınıstri Nurlan Saýranbaev óziniń burynǵy orynbasary Sátjan Ablalıev ustalǵan kezde onyń qujattaryn tergeý organdary tekserýge alǵanyn aıtty.

Búgin Úkimet otyrysynan keıingi baspasóz máslıhatynda tilshiler burynǵy kólik vıtse-mınıstri Sátjan Ablalıevtiń ustalýyna qatysty suraq qoıdy.

Óz kezeginde N. Saýranbaev burynǵy vıtse-mınıstr negizgi qyzmetine qatysty qamaýǵa alynǵanyn aıtty.

— Tergeý amaldary júrip jatqanyn eske otyryp, basqa mán-jaıdy aıta almaımyn… Tergeý organdarynyń ózindik atqaratyn is-qımyldary bar. Osy oraıda onyń qujattaryn (tekserý aıasynda) aldy, — dedi mınıstr.

Aıta keteıik, 2025 jyldyń 4 tamyzy kúni Qazaqstannyń kólik vıtse-mınıstrin para aldy degen kúdikpen QR UQK Sybaılas jemqorlyqpen kúres qyzmeti ustaǵan. Sot sanktsııasymen ol qamaýǵa alyndy. 

Keıinnen Sátjan Ablalıev resmı túrde kólik vıtse-mınıstri laýazymynan bosatylǵany málim boldy.

Aıta keteıik, Sátjan Ablalıev eńbek jolyn 1987 jyly Ońtústik Embi munaı barlaý ekspedıtsııasy Ortalyq ınjenerlik-tehnıkalyq qyzmetiniń operatory bolyp bastaǵan. 1996 jyldan 2004 jylǵa deıin Qazaq kólik jáne kommýnıkatsııa akademııasynda jumys istedi. Kóptegen jyldar boıy Kólik jáne kommýnıkatsııa; Investıtsııalar jáne damý; Indýstrııa jáne ınfraqurylymdyq damý mınıstrlikteriniń qurylymynda qyzmet atqardy. Buǵan deıin Soltústik Qazaqstan oblysy ákiminiń orynbasary bolyp jumys istedi.