Kólik-logıstıkalyq ınfraqurylymdy damytýǵa $35 mlrd ınvestıtsııalandy

ASTANA. KAZINFORM — Saýda jáne ıntegratsııa vıtse-mınıstri Áset Núsipov eksport kólemin arttyrý úshin kólik-logıstıkalyq ınfraqurylymdy damytý jumystary qalaı júrip jatqanyn aıtty.

— Mańyzdy baǵyttardyń biri — kólik-logıstıkalyq ınfraqurylymdy damytý. Sońǵy 15 jylda Qazaqstan bul salaǵa 35 mıllıard dollar ınvestıtsııa saldy. Sonyń arqasynda jańa kólik dálizderiniń qurylysy júzege asyp, temir joldardy jańǵyrtý jáne habtardy damytý múmkin boldy. Munyń bári qazaqstandyq ónimderdi jetkizý jyldamdyǵy arttyryp, satyp alýshylardyń senimdiligin aıtarlyqtaı arttyrdy, — dedi ol Qazaqstan eksporttaýshylarynyń forýmynda.

Sondaı-aq vıtse-mınıstr tsıfrlandyrý men onlaın eksportty damytýǵa erekshe kóńil bólinip jatqanyn atap ótti.

— Elektrondyq saýda naryqqa kirý kedergilerin azaıtyp, tranzaktsııalyq shyǵyndardy tómendetedi jáne áleýetti satyp alýshylar aıasyn keńeıtedi. Biz ulttyq E-com platformasyn iske qosýdan bastap, qazaqstandyq taýarlardy halyqaralyq marketpleısterge shyǵarý jumystaryna deıingi aralyqta júıeli sharalardy júzege asyryp jatyrmyz. «Bir tereze» qaǵıdaty boıynsha elektrondyq sertıfıkattaý, logıstıka, eksporttyq mámilelerdi súıemeldeý syndy tsıfrlyq servıster belsendi túrde engizilip keledi, — dedi Áset Núsipov.

Onyń aıtýynsha, mınıstrlik kásipkerlerdi oqytýǵa da erekshe nazar aýdarylyp otyr. Olardyń elektrondyq saýda talaptaryna beıimdelýine jáne B2B, B2C naryqtaryna shyǵýyna kómektesetin akseleratsııalyq baǵdarlamalar, onlaın kýrstar men vebınarlar uıymdastyrylyp keledi.

Aıta keteıik, buǵan deıin byltyr Qazaqstan eksportynyń kólemi 80 mlrd dollarǵa jetkenin jazǵan edik.