Kólik kontrabandasy nege tyıylmaı tur
ASTANA. KAZINFORM — Qoǵam belsendisi Erkebulan Kúlbasov elimizge kontrbandalyq jolmen avtomobıl ákelýdiń joldaryn atady.
— 2022 jyly 1 qyrkúıekte Memleket basshysy Qasym-Jomart Toqaev avtokólikterdi zańdastyrý týraly aıtqan bolatyn. Eń basty tapsyrmasy — kontrabandalyq jolmen keletin avtomobılderge tyıym salý. Ol avtokólikter áli de kirip jatyr. Máselen, Japonııadan keletin rýli oń jaqtaǵy kólikter bar. Ol bizdiń tehnıkalyq reglamentke saı kelmeıdi. 2007 jyldan beri basqarýǵa tyıym salynǵan. Kólikter Japonııadan Reseıdiń Vladıvostok qalasyna qosalqy bólshek retinde ákelinedi. Odan keıin Qazaqstanǵa esh kedergisiz jetkizilip, azamattarymyzǵa satylady. Al kólikterdi elimizde qalaı basqarady? Eýrazııalyq ekonomıkalyq elderiniń memlekettik tirkeý nómirin taǵyp, jalǵan saqtandyrý polısimen júre beredi. Elimizge kirip jatqan kólik kontrabandasynyń ekinshi túri — úshinshi eldiń azamattary júrgizip keletin avtomobılder. Máselen, Grýzııadan elimizdiń tehnıkalyq reglamentine saı kelmeıtin kólikter ákelinip, azamattarymyzǵa satady. Aıtalyq, Mańǵystaý oblysyna kólik aıdap kelgen úshinshi eldiń azamaty Aqtaý qalasynan keri ushyp ketedi, — dedi qoǵam belsendisi Amanat partııasy janyndaǵy Sybaılas jemqorlyqqa qarsy is-qımyl jónindegi respýblıkalyq komıssııa otyrysynda.
Sonymen qatar ol Qytaıdan elimizdiń tehnıkalyq reglamentine saı kelmeıtin Eýro-2, Eýro-0 standartty avtomobılder kirip jatqanyn aıtady.
— Ókinishke oraı olar elimizde jetkizilgennen keıin kólik quralynyń qaýipsizdigi sertıfıkatyn alady. Olardyń qolyna qujat bolǵan soń Memlekettik kirister komıteti ony rásimdeýge mindetti. Tehnıkalyq retteý jáne metrologııa komıtetinen akkredıtatsııa alǵan mekemeler «barmaq basty, kóz qysty» áreketterge baryp jatyr. Elimizge ákelingen kólikter qaýipsizdik sertıfıkatyn alý úshin SOS dabyl belgisimen jabdyqtalýy tıis. Mundaı dabyl belgisi joq kólikter úshin aqsha tóleseń bolǵany, tekserýden ótip ketýge bolady, — dedi Erkebulan Kúlbaev.
Aıta ketelik elimizde mamyr aıynda 128 myń avtokólik esepke qoıyldy.