Kólik qandaı jaǵdaıda aıyp turaǵyna jetkiziledi
ASTANA. KAZINFORM – Jol qozǵalysy erejesin buzǵan kez kelgen jaǵdaıda kólik avtomatty túrde aıyp turaǵyna áketilmeıdi. Avtomobıldi májbúrlep evakýatsııalaý zańnamada kózdelgen naqty jaǵdaılarda ǵana qoldanylady.
Qostanaı qalasy Polıtsııa basqarmasynyń memlekettik avtoınspektory Altaı Jumabaevtyń aıtýynsha, kólikti arnaıy alańǵa nemese turaqqa jetkizýge ony ustaýǵa zańdy negiz bolǵan kezde ǵana jol beriledi.
Kólikti qandaı jaǵdaıda evakýatsııalaıdy
Tájirıbede eń jıi kezdesetin sebepterdiń biri – toqtaý jáne turaqqa qoıý erejelerin buzý.
Avtomobıl jol qozǵalysyna kedergi keltirse, joldyń júretin bóligin nemese kólik kirip-shyǵatyn jerdi jaýyp qalsa, basqa jol qozǵalysyna qatysýshylarǵa bóget jasasa nemese qaýip tóndirse, ony evakýatsııalaýy múmkin.
– Kólik quralyn evakýatsııalaý Jol qozǵalysy erejesin buzǵan árbir jaǵdaıda avtomatty túrde qoldanylmaıdy. Avtomobıldi ustap, arnaıy alańǵa nemese turaqqa jetkizýge Qazaqstan Respýblıkasynyń zańnamasynda kózdelgen jaǵdaılarda ǵana jol beriledi. Bul shara kólik quralyn ustaýǵa negiz bolǵan quqyq buzýshylyq anyqtalyp, onyń sebebin joıý qajet bolǵan jaǵdaıda qoldanylady, – dedi Altaı Jumabaev.
Sonymen qatar ereje buzylǵanynyń ózi kóliktiń mindetti túrde aıyp turaǵyna jetkiziletinin bildirmeıdi. Ár jaǵdaı jeke qaralady.
Evakýatsııany toqtatýǵa bola ma
Eger júrgizýshi nemese kólik ıesi avtomobıl arnaıy turaqqa jetkizilgenge deıin kelse, keıbir jaǵdaıda evakýatsııany toqtatýǵa bolady. Ol úshin kólikti ustaýǵa sebep bolǵan quqyq buzýshylyqty joıý qajet.
Máselen, avtomobıl durys qoıylmaı, qozǵalysqa kedergi keltirip tursa, júrgizýshi ony ruqsat etilgen jerge aýystyra alady.
– Polıtsııa qyzmetkerleriniń mindeti – kólikti qalaı da evakýatsııalaý emes, jol qozǵalysy qaýipsizdigin qamtamasyz etý jáne quqyq buzýshylyqty joıý, – dedi memlekettik avtoınspektor.
Evakýatsııa týraly sheshimdi kim qabyldaıdy
Kólikti ustaý jáne arnaıy turaqqa jetkizý týraly sheshimdi ýákiletti qyzmetker qabyldaıdy.
Avtomobıldi alyp ketpes buryn onyń jaǵdaıy tekserilip, qabyldaý-tapsyrý aktisinde tirkelýi tıis.
– Bul kóliktiń evakýatsııaǵa deıin qandaı jaǵdaıda bolǵanyn naqtylaý jáne keıin yqtımal zaqymdarǵa baılanysty daý týyndamaýy úshin qajet, – dep túsindirdi polıtsııa qyzmetkeri.
Evakýatsııa jeke jaza nemese aıyppul bolyp sanalmaıdy. Bul – zańda kózdelgen jaǵdaılarda qoldanylatyn shara.
Kólik zańsyz evakýatsııalansa ne isteý kerek
Eger kólik ıesi avtomobıl zańsyz ustaldy nemese evakýatsııalandy dep eseptese, laýazymdy tulǵalardyń áreketine shaǵymdanýǵa quqyly. Ol úshin joǵary turǵan organǵa nemese sotqa júginýge bolady.
Júrgizýshi óz ustanymyn dáleldeıtin materıaldardy saqtap qoıǵany jón. Olardyń qataryna oqıǵa ornyndaǵy foto jáne vıdeo, kólik qujattary, hattamalardyń, aktilerdiń jáne evakýatsııa kezinde rásimdelgen basqa da qujattardyń kóshirmeleri kiredi.
Shaǵym túskennen keıin kólikti ustaýǵa zańdy negizdiń bolǵan-bolmaǵany jáne evakýatsııa rásiminiń talapqa saı júrgizilgeni tekseriledi.
Evakýatorǵa qashan aqsha tólenedi
Bul jerde kóliktiń evakýatsııasy qaı kezeńge jetkeni mańyzdy.
Eger avtomobıl evakýatorǵa áli tıelmese, evakýatsııa úshin aqy tóleýdiń qajeti joq. Kólik evakýatorǵa tıelip qoıǵan jaǵdaıda qyzmet qunynyń bir bóligi alynýy múmkin. Al evakýator avtomobıldi arnaıy turaqqa qaraı alyp júre bastasa, jetkizý qyzmetiniń tolyq quny tólenedi.
Demek, evakýatordyń oqıǵa ornyna kelýi kólik mindetti túrde aıyp turaǵyna áketiledi degen sóz emes. Júrgizýshi der kezinde kelip, quqyq buzýshylyqtyń sebebin joısa, avtomobıldi ornynda qaldyrýǵa múmkindik bar.
Aıta keteıik, Almatyda bir kúnde 30 kólik aıypturaqqa jetkizildi.
