Kólik qaqqan «Lıverpýl» klýby jankúıerleriniń jaǵdaıy málim boldy

ASTANA. KAZINFORM – «Lıverpýl» klýby jankúıerlerin kólik qaǵý oqıǵasy saldarynan 65 adam zardap shegip, olardyń 11-i aýrýhanada jatyr, dep habarlaıdy Kazinform agenttiginiń menshikti tilshisi.

Dúısenbi kúni aǵylshyn premer-lıgasyndaǵy «Lıverpýl» komandasynyń jeńisin toılap jatqan jankúıerlerdi kólik qaǵyp ketip, 11 adam aýrýhanaǵa túsken bolatyn. Zardap shekkenderdiń barlyǵy 65 adamǵa jetti.

Oqıǵa jergilikti ýaqyt boıynsha saǵat 18:00-de Lıverpýl ortalyǵynda boldy. Qala kóshelerinde kólik qozǵalysyna shekteý qoıylǵan bolatyn. Alaıda oqıǵa bolǵanǵa deıin az ýaqyt buryn júrek talmasy ustaýy múmkin degen kúdikpen shaqyrylǵan jedel járdem kóligi úshin bul shekteý ýaqytsha alynǵan edi.

Jegilikti polıtsııa basshysy Djennı Sımstiń sózinshe, Ford Galaxy markili kóliginiń júrgizýshisi jedel járdem kóliginiń artynan júrip otyrǵan. Sóıtip, kólik jankúıerlerdi soqqan. Oqıǵa saldarynan 11 adam aýrýhanada jatyr. Olardyń jaǵdaıy turaqty dep baǵalanyp otyr.

Alaıda Lıverpýl meri Stıv Rozeram seısenbi kúni tań ata tórt adamnyń jaǵdaıy aýyr ekenin jetkizdi.

Shamasy áńgime órt sóndirýshiler aıtqan kóliktiń astynda qalyp qoıǵan adamdar týraly bolýy kerek. Óıtkeni ol adamdardy shyǵarý úshin kólikti kóterý kerek bolǵan.

Polıtsııa 53 jastaǵy brıtanııalyq Lıverpýl turǵynyn ustady. Ol kisi óltirýge oqtaldy, kólikti qaýipti jáne esirtkige mas kúıde júrgizdi degen kúdikpen qamaýǵa alyndy.

Kúdikti qamaýda otyr, oqıǵa boıynsha tergelip jatyr. Dúısenbi kúni keshkisin polıtsııa «bul terakt bolýy múmkin» degen nusqany joqqa shyǵardy.

Osyǵan deıin «Lıverpýl» klýbynyń jankúıerlerin kólik basyp ketkeni týraly habarlaǵan bolatynbyz.