Kólik apatynan qaza bolǵandardyń otbasyna tólenetin ótemaqy eki ese ósedi – zań jobasy
ASTANA. KAZINFORM — Májilis kólik apatynan zardap shekkenderge saqtandyrý kompanııalary tóleıtin ótemaqynyń mólsherin kóterýge arnalǵan zań jobasyn ázirlep, Úkimet oǵan oń qorytyndy berip otyr. Bul týraly depýtat Nartaı Sársenǵalıev BAQ ókilderine bergen suhbatynda aıtty.
— Búginge deıin jol apatynan qaza tapqan azamattyń jaqyndaryna saqtandyrý kompanııalarynyń tóleıtin ótemaqysy 2000 aılyq eseptik kórsetkish bolsa, biz sony 4000 AEK-ke jetkizip otyrmyz. Aqshaǵa shaqsaq, 7 mln teńgeden 15 mln teńgege kóteriledi, — deıdi ol.
Aıtýynsha, Májilistiń 10 depýtatynyń bastamasymen ázirlengen qujatqa Úkimet oń qorytyndy bergen.
— Jol apatynyń saldarynan múgedektikke dýshar bolǵan azamattarǵa tólenetin ótemaqyny da eki ese ósirgeli otyrmyz. Mysaly, І top múgedegi bolyp qalǵan azamatqa buǵan deıin 1600 AEK kóleminde ótemaqy tólense, zań jobasy ony 3200 AEK-ke jetkizýdi kózdeıdi. ІІ top múgedegi bolǵan adamǵa saqtandyrý kompanııalary tóleıtin ótemaqyny 2400 AEK-ten 3400 AEK-ke, ІІІ top múgedegi bolǵan azamattyń ótemaqysyn 500 AEK-ten 1000 AEK-ke jetkizdik. Jol apatynan bala qaza tapsa, ata-anasyna tólenetin ótemaqyny 2000 AEK dep qostyq, — deıdi Nartaı Sársenǵalıev.
Zań jobasynda kólik apatynan zaqym kelgen kólikti jóndeý shyǵyndaryna tólenetin ótemaqy mólsherin kóterýge arnalǵan norma bar.
— Taǵy bir mańyzdy dúnıe bar kóligińizben basqa bireýdiń kóligin soqsańyz, ózińiz kelisimshart jasasqan saqtandyrý kompanııasy zardap shekken kólik ıesine tóleıtin ótemaqynyń maksımaldy kólemi 600 AEK nemese 2 mln 400 myń teńgeniń kóleminde. Biz sony 1200 AEK-ke nemese 4 mln teńgeden astam qarajatqa kótermekshimiz, — dedi depýtat.
Aıta ketelik ІІM jol apatyna jıi ákeletin jaıttardy ataǵan edi.
