Kólik alýdyń jańa tetigi: avtosalondar lızıngtiń sharttaryn jarııalaıdy

ASTANA. KAZINFORM — Avtokólikti lızıngke alý baǵdarlamasy aıasynda qandaı talaptar eskerilgen? Bul suraqqa Saýda jáne ıntegratsııa vıtse-mınıstri Aıdar Ábildabekov jaýap berdi.

- Іshki saýda boıynsha tıisti túzetýler engizildi. Jańa kólikti jeke adamdardyń paıdalanýyna berý úshin avtolızıng tetigi qamtylǵan. Bul turǵyda avtokólikti keıinnen satyp alý nemese keri qaıtarý quqyǵy bar. Osy protsedýra azamattyq zańnamaǵa sáıkes júzege asyrylady. Jalpy, kommertsııalyq shartty, paıyzdyq mólsherlemeni jeke tártipte lızıng berýshiler aıqyndaıdy. Ár avtosalon lızıng boıynsha óz talabyn qoıady. Atap aıtqanda, avtokólikti jeńildetilgen nesıe sharttarymen berý quzyreti Ónerkásip jáne qurylys mınıstrligine qatysty bolǵandyqtan, ishki reglamentti osy vedomstvo pysyqtaıdy, - dedi A. Ábildabekov Úkimet otyrysynan keıingi baspasóz máslıhatynda. 

Osy oraıda ol bul jańa tetik arqyly halyqqa avtokólikti lızıngke alýǵa múmkindik beretinin atap ótti. 

- Sonymen qatar, Qazaqstanda shyǵarylǵan kólikterdiń satylymyna jaǵdaı jasalady, - dedi vıtse-mınıstr.

Buǵan deıin habarlanǵandaı, 1 jeltoqsannan bastap Qazaqstanda jeke tulǵalarǵa arnalǵan jańa avtolızıng baǵdarlamasy iske qosylmaq.

Qazir elimizde lızıng tek zańdy tulǵalarǵa, ıaǵnı avtoparki bar kompanııalarǵa ǵana beriledi.

Lızıng — uzaq merzimge avtokólikti, jabdyqty nemese tehnıkany jalǵa berý túri. Lızıng kompanııasy belgili bir múlikti satyp alyp, ony adamdarǵa ózara kelisken merzimge paıdalanýǵa beredi. Jalǵa alýshy sol múlikti aı saıyn nemese kelisim boıynsha tólemder jasap paıdalana alady.