Kólik aǵyny 80 paıyzǵa ósti: Astana — Petropavl jolynyń 30 shaqyrymy jańartyldy
ASTANA. KAZINFORM — Soltústik Qazaqstan oblysynda «Astana — Kókshetaý — Petropavl — RF shekarasy» avtojolynyń qaıta jańartylǵan 30 shaqyrymy ashyldy, dep habarlaıdy Kólik mınıstrliginiń baspasóz qyzmeti.
2026 jylǵy 22 tamyzda respýblıkalyq mańyzy bar «Astana — Kókshetaý — Petropavl — RF shekarasy» avtomobıl jolynyń qaıta jańartylǵan 30 shaqyrymdyq ýchaskesinde negizgi qurylys jumystary aıaqtalyp, kólik qozǵalysy ashyldy.
Qaıta jańartý jumystary joldyń 465–496 shaqyrymdary aralyǵynda júrgizildi. II tehnıkalyq sanattaǵy bul jol Soltústik Qazaqstan oblysynyń mańyzdy kólik baǵyttarynyń biri sanalady. Ol óńirdegi qatynasty qamtamasyz etýmen qatar, halyqaralyq tranzıttik tasymalda mańyzdy ról atqarady.
— Atalǵan avtojol Qazaqstan men Reseı Federatsııasyn baılanystyratyn mańyzdy tranzıttik baǵyttardyń biri. Ol eki eldiń ónerkásiptik ortalyqtary arasyndaǵy júk jáne jolaýshylar tasymalyn qamtamasyz etedi. Mundaı joldardy damytý shekaralas óńirler arasyndaǵy ekonomıkalyq baılanysty nyǵaıtyp, logıstıkanyń tıimdiligin arttyrýǵa jáne saýda qatynastaryn keńeıtýge múmkindik beredi. Joldy aýqymdy jańǵyrtý qajettiligi kólik qozǵalysynyń aıtarlyqtaı artýymen de baılanysty. 2015 jyly bul ýchaskedegi ortasha táýliktik qozǵalys qarqyndylyǵy 2 793 avtokólikti qurasa, búginde táýligine orta eseppen 5 034 kólik ótedi, ıaǵnı kólik aǵyny 80%-dan astam ósken, — delingen mınıstrlik taratqan aqparatta.
Joba aıasynda kópqabatty jańa jol tósemin salý boıynsha keshendi jumystar oryndaldy. Jol jabynynyń ústińgi qabaty qalyńdyǵy 5 sm qıyrshyqtasty-mastıkalyq asfaltbetonnan, tómengi qabaty 10 sm iri túıirshikti asfaltbetonnan tóseldi.
Negizdiń ústińgi qabaty qalyńdyǵy 13 sm joǵary keýekti iri túıirshikti asfaltbetonnan, tómengi qabaty 16 sm qum-qıyrshyqtas qospasynan salyndy. Sondaı-aq qalyńdyǵy 20 sm qıyrshyqtasty topyraqtan tósenish qabaty jáne 50 sm iri kesekti topyraqtan úıindiniń joǵarǵy qabaty salyndy.
Nysanda oryndalǵan jer jumystarynyń jalpy kólemi shamamen 986 myń tekshe metrdi qurady.
Qaıta jańartý barysynda jol qozǵalysy qaýipsizdigine erekshe kóńil bólindi. Ýchaskede 10 965 boılyq metr qorshaý, 266 jol belgisi jáne 1 366 sıgnaldyq baǵana ornatyldy. Jolǵa uzaq merzimge tózimdi termoplastık tańbalar salyndy.
Sýdy tıimdi burý úshin 31 sý ótkizý qubyry salyndy. Onyń 16-sy negizgi jolda, taǵy 15-i jolǵa qosylatyn ýchaskelerde ornalasqan. Sonymen qatar eki jańa avtopavılon ornatyldy.
Júrgizýshiler men jolaýshylarǵa arnalǵan zamanaýı demalys alańy da salyndy. Munda sanıtarlyq-gıgıenalyq torap pen tórt otyrǵysh qarastyrylǵan. Syrtqy jaryqtandyrý úshin 48 jaryq baǵanasy ornatyldy.
Jobany iske asyrýǵa 138 jol-qurylys tehnıkasy men 153 maman jumyldyryldy. Asfaltbeton qospasyn óndirý qýattylyǵy saǵatyna 160 tonna bolatyn asfaltbeton zaýytymen qamtamasyz etildi.
Jańartylǵan ýchaskede qozǵalystyń ashylýy jol qaýipsizdigi men qozǵalys jaılylyǵyn arttyrýǵa, ótkizý qabiletin jaqsartýǵa jáne artyp kele jatqan kólik aǵyny úshin senimdi jaǵdaı jasaýǵa múmkindik beredi.
Budan buryn mıllıardtar bólingen SQO joldary nege qaıta-qaıta jóndeýdi qajet etetinin jazǵan edik.
