Qolymmen jasaǵan isimdi basymmen kóteremin — Ernar Jıembaı
ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyq isi boıynsha ótip jatqan sot protsesinde aıyptalýshy Ernar Jıembaıǵa sońǵy sóz berildi.
Aıyptalýshy óz sózinde barsha qazaq elinen keshirim surap, sottan ádil sheshim shyǵarýdy ótindi. Ol taǵylǵan aıypqa ishinara kelisetinin aıtty.
— Maǵan taǵylǵan aıyppen ishinara kelisemin. Alaıda, bul oqıǵa ózdiginen ózi bolǵan joq dep naqty aıta alamyn. Men ózimdi esi durys adam retinde aıta alamyn. Saraptama qorytyndylary da bar. Sebepsizden sebepsiz baryp, tıispegen adamǵa qarýymdy alyp, qorqytý maqsatynda oq atqan joqpyn. Sot tergeýinde bergen jaýabymdy tolyq qýattaımyn. Jábirlenýshi Rýslan Arysbekulynan keshirim suraımyn. Qalaı bolmasyn men ol kisiniń densaýlyǵyna aýyr zııan keltirdim, — dedi ol.
Sonymen birge aıyptalýshy oqıǵanyń saıası astary joq ekenin, bul ekeýara jeke másele bolǵanyn alǵa tartty.
— Bul — men úshin úlken sabaq. Men osyny túsindim. Syrtta ata-anam qaldy. Men de adam balasymyn. Meniń de júregim bar. Ákem aýyrady. Otbasymdy asyraýshy uldardyń biri edim. Eki ulym qaldy. Otbasym men balalarymdy oılasam, qatty qınalamyn. Ókinemin. Bul oqıǵa artqa aınalsa, mundaı jaǵdaıǵa eshqashan barmas edim. Sottan QR Qylmystyq kodeksiniń 106-babynyń 1-bóligimen jeńil jaza taǵaıyndaýdy suraımyn, — dedi Jıembaı.
Ernar Jıembaı sondaı-aq Rýslan Berdenov tarapynan 25 mıllıon teńge kóleminde ótemaqy talap etilgenin aıtyp ótti. Aıyptalýshynyń aıtýynsha, ózine de moraldyq turǵyda aýyr soqqy tıgen.
Sóz sońynda ol sottan ádildik kútetinin jetkizdi.
— Qolymmen jasaǵan isimdi basymmen kóteremin. Áýeli Allaǵa, odan keıin ádil sotqa senemin. Barsha qazaq halqynan taǵy da keshirim suraımyn. Zań aıasynda jeńil jaza taǵaıyndaýyńyzdy ótinemin, — dedi aıyptalýshy.
Al, sýdıa Ábinur Qarabaev sot úkiminiń aldyn ala jarııalanýy 20 tamyz kúni saǵat 12:00–ge taǵaıyndalǵanyn aıtty.
Eske sala keteıik, budan buryn prokýror aıyptalýshy Ernar Jıembaıǵa 11 jyl 3 aı bas bostandyǵynan aıyrý jazasyn surap, sondaı-aq jábirlenýshi taraptyń paıdasyna 30 AEK (118 890 teńge) óndirýdi talap etkenin jazǵan bolatynbyz.