Kóliktiń terezesin buzyp, ishine endi: Elordalyq polıtseı mas júrgizýshini ustady
NUR-SULTAN. QazAqparat – Elordada mas júrgizýshi baǵdarsham baǵanyn qaǵyp, polıtsııa kóliginen qashyp ketpek boldy, dep habarlaıdy QazAqparat tilshisi.
«Osy jyldyń 11 qańtarynda saǵat 22.35-te reıd kezinde Beısekova men Qosshyǵululy kósheleriniń qıylysynda polıtsııa qyzmetkeri jol erejesin óreskel buzyp, baǵdarsham baǵanyn soqqan «Honda» markaly kóligin baıqap qalǵan. Osydan keıin polıtseı kóliktiń izine túsken. Júrgizýshi daýys zoraıtqysh arqyly aıtylǵan toqtaý týraly talapty elemeı, qashyp ketpek bolǵan. Basqalarǵa naqty qaýip tóndirgen júrgizýshiniń odan arǵy qozǵalysyna jol bermeý úshin Nur-Sultan qalalyq Polıtsııa departamentiniń patrýldik polıtsııa polkiniń ınspektory, kishi leıtenant Madııar Sultanov kóliktiń baǵdarshamǵa toqtaǵanyn paıdalanyp, júgirip baryp, áınegin shaǵyp, buzaqyny ustady», - dep habarlaıdy Polıtsııa departamentinen.
Madııar Sultanov kólikke jaqyndaǵan kezde júrgizýshiniń mas bolǵanyna kózi jetkenin aıtady.
«Ol esikti ashpaı qoıǵannan keıin, terezeni shaqqan abzal dep sheshtim. Qalyptan tys jaǵdaıda eń durys sheshim osy degen oıda boldym. Sebebi, ol qashyp ketip, arty qıyn jaǵdaıǵa ulasýy múmkin edi. Júrgizýshi qarsylyq tanytqanymen, kiltti otaldyrý tetiginen sýyryp aldym», - deıdi ol.
Medıtsınalyq kýálandyrýdan ótken 35 jastaǵy qala turǵynynyń orta dárejede mas bolǵany anyqtaldy. Júrgizýshi ustalyp, kóligi kommýnaldyq turaqqa jetkizilgen. Quqyqbuzýshyǵa qatysty QR ÁQBjK-nyń 608-baby boıynsha ákimshilik hattama toltyryldy.
Eske salaıyq, elimizde 11 qańtardan bastap kólikti mas kúıinde basqarǵan júrgizýshilerge jaýapkershilikti kúsheıtetin Zań kúshine endi. Oǵan sáıkes, tártip buzýshylar ómir boıyna kólik júrgizý quqyǵynan aıyrylýy nemese 5 jylǵa deıin túrmege toǵytylýy múmkin.
