Kóliktiń suranysqa ıe nómirin baj salyǵyn tólemeı úlestirýdiń 450 deregi tirkelgen

QONAEV. QazAqparat - Almaty oblysynda kólik quraldaryn 13,5 mlrd teńge shamasynda alym tólemeı bastapqy tirkeýdiń 2 329 faktisi anyqtaldy, dep habarlaıdy QazAqparat Memlekettik kirister komıtetine silteme jasap.

Almaty oblysynda shetelden alǵashqy tirkeý úshin alym tólemeı aýyr júk kólikterin ákelýdiń kóptegen derekteri, sondaı-aq memlekettik baj tólemeı joǵary suranysqa ıe memlekettik nómirlik belgilerdi berý jaǵdaılary belgili boldy. Óńirdik salyq qyzmetkerleri Ákimshilik polıtsııa basqarmasyn tekserý kezinde (2018-2021 jyldar aralyǵyn) avtokólik quraldaryn 13,5 mlrd teńge shamasynda alym tólemeı bastapqy tirkeýdiń 2 329 faktisin anyqtady.

«Úshinshi elderden ákelinetin avtokólik quraldary, atap aıtqanda, shyqqanyna 7 jyldan asatyn ershikti tartqyshtar bastapqy esepke qoıý kezinde mólsheri 2 500 AEK (2019 jyly – 6,3 mln.teńge, 2020 jyly – 6,9 mln. teńge, 2021 jyly – 7,3 mln. teńge) quraıtyn alym tólemegen. Sondaı-aq, memlekettik bajdy tólemeı joǵary suranysqa ıe memlekettik nómirlik belgilerdi berýdiń 450 deregi tirkeldi. Nátıjesinde bıýdjetke 135,7 mln teńge shyǵyn kelgen. Tsıfrlyq jáne áriptik máni birdeı nómirler úshin baj 174 000 teńgeden 872 900 teńgege deıin ózgeredi», - dep jazdy vedomstvodan.

Bul faktiler mindetti tólemderdi is júzinde tólemeı qyzmetterdi alýdyń júıeli tásilin kórsetedi ári bıýdjettiń eleýli shyǵyndaryna alyp keldi.

Qazirgi ýaqytta ákimshilik polıtsııa joǵaryda kórsetilgen qyzmetterdi standartty emes jolmen alǵan tulǵalardan túspegen alym men baj somalaryn óndirip alý boıynsha is-sharalar júrgizýde. Tekserý materıaldary kináli adamdar tobyn anyqtaý jáne tıisti sheshim qabyldaý úshin quqyq qorǵaý organdaryna jiberildi.