Kóliktik baqylaý komıteti «QTJ»UK» AQ-nyń 48 fılıalyn tekserip jatyr
ASTANA.QazAqparat - Kóliktik baqylaý ınspektsııasy mamandary júrgizgen tekserister barysynda «QTJ» UK» AQ-nyń birqatar fılıaldarynda temirjol kóliginde joldyń joǵary qurylysyn tehnıkalyq paıdalaný jáne qaýipsizdik erejelerin óreskel buzý faktileri aıqyndaldy.
Bul týraly QR Kólik jáne Kommýnıkatsııa mınıstrliginiń baspasóz qyzmeti habarlady.
Búgingi kúnge temirjoldyń magıstraldik jelisiniń birqatar ýchaskeleri jabyldy jáne qozǵalys shekteldi. Aıtalyq, rels sorabynyń tarylyp ketýine baılanysty «RZD-17 - RZD-33» jáne «Qaraǵanózek - Qarabas» ýchaskelerindegi qozǵalys jabyldy. Keıingisindegi qozǵalys budan buryn ashylǵan buzýshylyqtardy sapasyz túzegendigi úshin qaıta jabylǵandyǵyn atap ótýge týra keledi. Munyń syrtynda «Lısakov-Altynsarın», «Jaryq-Jańaarqa», «Qarabas - OP 767», «RZD-17 - RZD-33», «OP42 - Qaraǵandy».ýchaskelerindegi qozǵalys jyldamdyǵy shekteldi. Qazirgi kezde tekserister jalǵastyrylýda.
Temirjol kóligindegi iri ereje buzýshylyqtar jıilep ketýine baılanysty Kóliktik baqylaý komıtetiniń tóraǵasy Áset Asavbaev Qaraǵandy, Ońtústik Qazaqstan, Jambyl, Shyǵys Qazaqstan jáne Almaty qalasynda «Qazaqstan temir joly» UK» AQ fılıaldary ókilderiniń qatysýymen kóshpeli jınalystar ótkizgendigin atap ótken jón. Kezdesýler barysynda temirjol kóligindegi qaýipsizdikti qamtamasyz etý jóninde naqty tapsyrmalar berildi.
Apattardyń aldyn alý maqsatynda aǵymdaǵy jylǵy І toqsan qorytyndysy boıynsha Qazaqstanda 68 lokomotıvtiń (ótken jylǵy osy kezeńde 70), 506 (20) júk vagony, 104 (32) jolaýshy vagony jáne 113 (64) arnaıy jol tehnıkasynyń paıdalanylýy toqtatyldy, sonymen birge 151 (53) kireberis joldaryna vagondardy berý jáne áketý ýaqytsha toqtatylǵandyǵyn eske salamyz.
Temirjoldyń qozǵalmaly quramy men joldarynyń paıdalanylýy toqtatylýynyń negizgi sebepteri josparly jóndeý jumystarynyń ýaqtyly júrgizilmeýi, vagondar toraptary men bólshekteriniń aqaýly bolýy, jol tabanynyń keńeıip jáne tarylyp ketýi bolyp otyr.
