Kóliktik baqylaý ınspektsııasynyń burynǵy qyzmetkeri 100 mln teńge aıyppul tóleıdi

NUR-SULTAN. QazAqparat - Almaty oblysy boıynsha kóliktik baqylaý ınspektsııasy basshysynyń burynǵy orynbasary 100 mıllıon teńge somasyndaǵy aıyppul tóleıtin boldy. Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttigi baspasóz qyzmetinen málim boldy, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosynyń Almaty oblysy boıynsha departamenti buryn oblystyq kóliktik baqylaý ınspektsııasy basshysynyń orynbasary jáne onyń baǵynyshtylaryna qatysty sotqa deıingi tergeýdi aıaqtaǵan bolatyn. Qazirgi tańda atalǵan laýazym ıelerine qatysty Almaty oblysy Taldyqorǵan qalalyq sotynyń úkimi kúshine endi. Kóliktik baqylaý ınspektsııasy basshysynyń orynbasary B. Jantýrov paraqorlyq faktileri boıynsha kináli dep tanyldy. Sonymen qatar, memlekettik qyzmette laýazymdardy atqarý quqyǵynan ómir boıyna aıyra otyryp, paranyń 35 eselegen somasy kólemindegi 101,3 mln teńge soma aıyppulǵa tóleıdi», - delingen vedomstvo málimetinde.

B. Jantýrovqa tasymaldaýmen aınalysatyn zańdy jáne jeke tulǵalardyń ókilderinen olardyń qyzmetine jalpy qamqorlyǵy úshin aldyn ala sóz baılasý arqyly adamdar tobynda júıeli negizde para alý aıyby taǵylǵan.

Sondaı-aq, B. Jantýrovpen birge taǵy 4 laýazymdy tulǵa jazaǵa tartyldy.