Kóliktik baqylaý ınspektsııasy mamandaryna túrmege ekskýrsııa uıymdastyryldy
SQO boıynsha sybaılas jemqorlyqqa qarsy qyzmet bul is-sharany «túzetý terapııasy» dep ataǵan. Birer jyl buryn qolǵa alynǵan is-shara pandemııaǵa baılanysty toqtap qalǵan edi. Bul joly kóliktik baqylaý ınspektsııasy mamandaryna «ES-164/1» tergeý mekemesine ekskýrsııa uıymdastyryldy.
«Bizdiń qyzmetimizde aldyn alý sharalary mańyzdy baǵyt bolǵanymen, sybaılas jemqorlyq qylmysy úshin eshkimdi jazasyz qaldyrǵanymyz joq. Sizderdiń ujymdaryńyzdy bekerden tańdaǵanymyz joq. Ótken jyly kóliktik baqylaý salasyndaǵy sybaılas jemqorlyq qylmystary úshin 2 qyzmetker sottaldy. Bıyl sáýir aıynda taǵy eki maman para alǵany úshin árqaısysy 6 jyl merzimge bas bostandyǵynan aıyryldy.
Úkim zańdy kúshine engen joq. Búgin qylmystyń qaıda aparatynyn kórip, sońǵy kezde qalyptasqan teris úrdisti toqtatasyzdar dep úmittenemiz», - dedi QR Sybaılas jemqorlyqqa qarsy is-qımyl agenttiginiń SQO boıynsha departamenti basshysynyń birinshi orynbasary Nurlan Jahın.
Kelýshiler qamaýdaǵylardy ustaý jaǵdaıymen tanysty, olardyń jatyn oryndaryn aralap, tar dálizderden ótip, serýendeýge arnalǵan kamerada taza aýamen tynystady. Kúnine bir aq ret osy múmkindikke ıe bolatyn tutqyndardyń kúıin bastan keshti.
Ekskýrsııa barysynda tergeý ızolıatorynyń bastyǵy Rústem Saǵdenov búginde 500-ge jýyq adam sııatyn mekemeniń tek jartysy ǵana tolǵanyn aıtyp, «jeńil aqsha tapqysy keletinder» úshin oryndar jetkilikti ekenin atap ótti.
Sóz sońynda Nurlan Jahın sybaılas jemqorlyqqa barǵan sheneýnikterdiń atqarǵan qyzmetteri men dárejesine qaramastan, zańnyń barlyq qatańdyǵy boıynsha jaýapqa tartylatynyn eskertti.
Esterińizge sala keteıik, birinshi toqsanda oblystyq Antıkor Kóliktik baqylaý ınspektsııasy qyzmetindegi sybaılas jemqorlyq táýekelderine syrtqy taldaý júrgizdi, nátıjesinde 25 sybaılas jemqorlyq táýekeldi anyqtady.
Osyǵan deıin SQO-da memorgan 1 keli makarondy 17 mln teńgeden satyp almaq bolǵanyn jazǵan bolatynbyz.