Kóliktik baqylaý ınspektsııasy qyzmetkeriniń aýyr júk kólikteri júrgizýshilerinen júıeli túrde para alý faktileri áshkerelendi

Bul týraly búgin elordada QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

Máselen, 2010 jylǵy 29 jeltoqsanda júrgizýshilerdiń birinen kedergisiz ótý úshin 20 myń teńge para alý ústinde «Jetisý» aımaqaralyq kóliktik baqylaý ınspektsııasynyń ınspektory ustaldy. Oǵan qosa jedel-tergeý sharalary kezinde atalǵan qyzmetkerdiń aýyr júk kóligi júrgizýshilerinen bopsalaý arqyly para alǵandyǵyn dáıekteıtin 7 fakti ashyldy. «Paranyń somasy kóliktiń jáne júktiń túrine qaraı 5 myńnan 20 myńǵa deıingi aralyqta bolǵan. Aıyptalýshy qamaýǵa alynyp, qylmystyq is tergelýde», - dedi resmı ókil.

Sondaı-aq M.Jumanbaıdyń atap ótýinshe, Pavlodar oblysynda Ertis ekologııa departamentiniń memlekettik ekologııalyq ınspektory Aýbashev tutqyndaldy. Ol «Mark-Astana» JShS zańgerinen janar-jaǵarmaı quıý stansysynyń jańadan boı kótergen nysanynyń daıyndyǵy týraly jumys komıssııasynyń qorytyndysyna qol qoıý úshin 100 myń teńge para bopsalaǵan.