Kólikti jóndeýge sot arqyly 8 mln teńge óndirip aldy
ASTANA. QazAqparat - Kólik ıesi saqtandyrý kompanııasy bergen ótemaqymen kelispeı, sot arqyly áldeqaıda kóp aqshany óndirip aldy, dep xabarlaıdy QazAqparat tilshisi.
Jol apaty osydan eki jyl buryn bolǵan. Sol kezde Hyundai mingen bir kelinshek aýladan shyǵyp kele jatqanda Lexus-pen soqtyǵysqan. Ol kólik tizgininde de áıel otyrǵan. Qozǵalys erejesine sáıkes, aýladan shyqqan kólik jol berýi tıis. Sebebi ekinshi kólik bas jolmen kele jatqan. Astana qalasynyń mamandyrylǵan aýdanaralyq ákimshilik sotynda Hyundai-dyń júrgizýshisi kináli dep tanylǵan bolatyn. Al Lexus-tyń ıesine saqtandyrý kompanııasynyń esebinen 1 mln teńge kóleminde materıaldyq shyǵyn tólendi. Degenmen, ol alǵashqy sot sheshimimen kelispeı, odan kóp aqshany talap etti. Sebebi jekemenshik baǵalaý kompanııasynyń esebine sáıkes, Lexus markaly kólikti jóndeýge 10 mln teńgeden astam aqsha qajet.
«Astana qalasynyń Esil aýdandyq sotynyń sheshimine sáıkes, zardap shekken áıeldiń paıdasyna 8 mln teńgeden astam materıaldyq shyǵyn óndirildi. Sot qaýlysy zańdy kúshine endi», - delingen sottyń resmı xabarlamasynda.
