Kólikti tehnıkalyq tekserý ortalyqtaryna talap kúsheıedi

ASTANA. QazAqparat – QR Іshki ister mınıstri Marat Ahmetjanov kólikti tehnıkalyq tekserý operatorlarynyń jaýapkershiligin kúsheıtýdi usyndy, dep habarlaıdy QazAqparat tilshisi.

Óz sózinde mınıstr eldegi avtoparktiń artyp kele jatqanyn aıtty.

«2019 jyldan bastap avtokólik sany 3,9 mıllıonnan 5 mıllıonǵa deıin ósti. Onyń ishinde sheteldik tirkeýdegi kólikter de bar. Buǵan qosa, avtopark eskirip jatyr. Elimizdegi 50 % paıyzdan astam kólikterdiń paıdalaný merzimi 20 jyldan asyp ketken. ıAǵnı, tozyǵy jetken», - dedi Іshki ister mınıstri Úkimettiń búgingi otyrysynda.

Sonymen birge, M. Ahmetjanov avtokólikterdiń tehnıkalyq jaǵdaıyna tıisti baqylaý júrgizilmeıtinin aıtty.

«Ózderińiz bilesizder, tehnıkalyq tekserý ortalyqtaryn ashýǵa qoıylatyn talaptar tómendetildi. 2016 jyly olardy ashý tártibi lıtsenzııalaýdan habarlama túrine ózgerdi. 2018 jyly bul qyzmetke ruqsat berý baqylaýy joıyldy. Bul jaǵdaı kólikti tehnıkalyq baıqaýdan jalǵan ótkizip, talondar berý praktıkasyna ákep soqty. Byltyr Sybaılas jemqorlyqqa qarsy qyzmet osyndaı 350 myń jalǵan qujat jasap, 600 mln teńge zańsyz tabys tapqan uıymdasqan qylmystyq topty ustady», - dedi vedomstvo basshysy.

Oǵan qosa, sońǵy 4 jylda tehnıkalyq jaıdaıǵa baılanysty baıqaýdan ótpeı qalǵan kólikterdiń sany eki esege azaıǵan.

«Bul árıne, úlken kúmán týdyrady. Óıtkeni kólikterdiń tehnıkalyq reglament talaptaryna saı kelmeýine baılanysty 106 myń júrgizýshi jaýapqa tartylǵan. Sondaı-aq, tehnıkalyq baıqaýdan ótpegen 80 myń júrgizýshige aıyppul salyndy. Kezinde bul fýnktsııa kásipkerlik salasyna berilgen bolatyn. Biraq, protsedýrany jeńildetemiz dep, kóptegen teris saldarǵa jol berdik. Jol apattary kóbeıip, jemqorlyq artty. Osyǵan baılanysty, Indýstrııa mınıstrligine avtokólikti jalǵan tekserý faktileri úshin tehnıkalyq baıqaý operatorlarynyń jaýapkershiligin kúsheıtýdi usynamyz», - dedi Marat Ahmetjanov.

Buǵan deıin spıker jyl saıyn elimizde 13 myń jol-kólik oqıǵasy bolatynyn, 2 myńnan astam adam qaza taýyp, 18 myń adam jaraqat alatynyn aıtqan edi.

Sonymen birge Marat Ahmetjanov avtomektepterdiń oqytý sapasyn synǵa aldy.

Foto: theautowarehouse.com