Kólikti onlaın tirkeý: Memlekettik nómirdi poshtamen úıge jetkizip beredi

ASTANA. QazAqparat - "Azamattarǵa arnalǵan úkimet" memlekettik korporatsııasynyń basqarýshy dırektory Baqtııar Qojaxmetov kólikti onlaın tirkeý týraly aıtyp berdi, dep xabarlaıdy QazAqparat tilshisi.

"Jaqynda biz avtokólikterdi onlaın rejimde tirkeý qyzmetin iske qostyq. Ony egov portaly arqyly alýǵa bolady. Endi, arnaıy xalyqqa qyzmet kórsetý ortalyǵyna barýdyń qajeti joq. Oǵan qosa, ishki ister mınıstrligi el ishinde júrgen kólikterdiń agregattaryn tekserý sharasyn alyp tastaǵan bolatyn. Qazir kólikti satyp alý kelisimshartyn elektrondy úkimet portalynda jasaı salýǵa bolady. Osydan keıin "Qazposhtanyń" qyzmetkeri memlekettik tirkeý nómiri men texnıkalyq tólqujatty úıińizge jetkizip beredi", - dedi B. Qojaxmetov NurOtan Trends alańynda.

Onyń aıtýynsha, búginde kólik júrgizýshi kýáligin de jyldam alýǵa bolady. Ol úshin arnaıy xalyqqa qyzmet kórsetý ortalyǵyna barýdyń qajeti joq.

Aıta keteıik, búgingi pikirtalas alańynda "Nur Otan" partııasy Tóraǵasynyń birinshi orynbasary Máýlen Áshimbaev geoaqparattyq júıe týraly aıtty. Atalǵan portalda bos jer telimderi týraly tolyq aqparat jarııalanady. "Ákimdikter arqyly jalǵa beriletin, ıa bolmasa, satylatyn jerler bolsa, barlyǵy aqparattyq júıede kórsetilýi shart. Ashyǵyn aıtý kerek, dál osy salada jemqorlyq kóp. Óıtkeni aqparat ashyq túrde jarııalanbaıdy. Jer telimderi týraly aqparattyń bári jabyq. Sondyqtan jańa portal arqyly jer telimderi týraly tolyq aqparat jarııalaımyz degen oıymyz bar. Aýktsıondar, kommýnıkatsııalar, jerdiń baǵasy - bári-bári jańa júıeniń ishinde bolady", - dep atap kórsetti M.Áshimbaev.