Kólikti mas kúıinde júrgizgen boıjetken aǵashqa soǵylyp, qasyndaǵy jolaýshysynyń densaýlyǵyna zaqym keltirdi - Astana ІІD
ASTANA. 26 shilde. QazAqparat - Elordada aşy sýdy simirip alǵan 21 jastaǵy boıjetken «Mersedes» kóliginiń basqarý tetigine ıe bola almaı, aǵashqa soǵyldy.
Bul týraly Astana qalalyq ІІD baspasóz qyzmetinen habarlady.
Oqıǵa saldarynan apatqa kináli názik jan bas jaraqatymen emdeý mekemesine jetkizilip, medıtsınalyq kómek kórsetildi. Keıin ol úıine jiberildi. Al onyń aıaq-qoly synyp, basy jaraqattanǵan jolaýshysy aýrýhanaǵa jatqyzyldy.
Astanalyq JPB baspasóz qyzmetinen habarlaǵandaı, kólik aıyppul turaǵyna qańtaryldy. Masaıǵan kúıinde kólik basqaryp, jolaýshynyń densaýlyǵyna zaqym keltirgen boıjetkenge Ákimshilik kodekstiń 467 baby 3 bóligi boıynsha ákimshilik is toltyryldy. Ol 4 jylǵa deıin kólik júrgizý quqyǵynan aıyrylýy yqtımal.
