Kólikti qysqa qalaı daıyndaý kerek – ІІM ókilinen keńes
NUR-SULTAN. QazAqparat – QR ІІM ákimshilik polıtsııa komıteti tóraǵasynyń orynbasary Serik Túsipov qaýipsizdikti saqtaý úshin kólikti qysqa qalaı daıyndaý kerektigin túsindirdi, dep habarlaıdy QazAqparat tilshisi.
«Qystygúni minsiz júretindeı kólikti daıyndap alǵan jón. Álbette, eń birinshi kezekte jazdyq dóńgelekti qystyq dóńgelekke aýystyrsańyz, ol jolda qaýipsizdiktiń saqtalyp, avtokóliktiń qozǵalys ótimdiligin arttyrýǵa sep bolady. Dóńgelektiń «tikenekti» nemese «úıkelisti» túrin naqty aımaqtyń ereksheligine baılanysty tańdap alý kerek. Sonymen qatar dál qazir kóliktiń jylytý júıesiniń, syrtqa jaryq túsirý qurylǵylarynyń, tereze tazartqyshynyń durystyǵyn tekserip, akkýmýlıator batareıasyn aýystyrǵan abzal», - dedi ІІM baspasóz máslıhatynda Serik Túsipov.
Onyń aıtýynsha, kólik qyzmetiniń aqaýsyz bolýy qozǵalystyń jaılylyǵy men qaýipsizdigin qamtamasyz etip, jol ústindegi qaýipti seıiltedi.
«Dızeldi otynmen júretin, jolaýshylardy nemese júkterdi tasıtyn avtokólikterge jeke toqtalsam deımin: aıazdy kúni orta jolda qalmas úshin jyl mezgiline saı sapaly solıarka quıǵan durys. Qys bastalysymen qutqarýshylar aıdalada kóligi toqtap qalǵan júrgizýshilerdi qutqarýmen bolady, óıtkeni olar qysqa arnalǵan solıarkanyń ornyna jazdyǵyn quıady. Osydan baryp ol qatyp qalady da kólik ary qaraı júre almaıdy», - deıdi ol.
Serik Túsipov júk kólikteriniń syrǵyp ketýine jol bermeıtin arnaıy qurylǵy bolýy kerektigin de eskertti. Ony júk kóliginiń júrgizýshileri uzaq ýaqytqa bir orynda, ásirese taýly jerde toqtaǵan kezde paıdalanady.
