Kólikterge VIP-nómirler satýdan qansha aqsha tústi
Mınıstrdiń aıtýynsha, "elektrondy úkimet" portaly arqyly mıllıondaǵan memlekettik qyzmet kórsetildi. Aldaǵy ýaqytta kompozıttik (bir qyzmettiń ishinde birneshe qyzmet - avt.) jáne proaktıvti (belgili bir qyzmetti alý qajettigi jaıynda aldyn ala eskertý - avt.) qyzmetterdi damytý jumysyna basymdyq berilmekshi.
"Kólik júrgizýshilerine arnalǵan mamandandyrylǵan Halyqqa qyzmet kórsetý ortalyqtary da jaqsy jumys istep keledi. Ótken jyly atalǵan ortalyqtar 1,8 mıllıon ret qyzmet kórsetti. Al joǵary suranysy bar memlekettik tirkeý nómirlerin satýdyń nátıjesinde bıýdjetke 1,2 mıllıard teńge tústi", - deıdi Abaev.
Budan bólek, poshta arqyly qujat jetkizý júıesi qolǵa alyndy. Al mobıldi toptar shalǵaı jerlerge baryp, tıisti qujattarǵa tapsyrys alyp júredi. "Árıne, biz árbir aýdanda Halyqqa qyzmet kórsetý ortalyǵyn asha almaımyz. Alaıda keń jolaqty ınternetti árbir aýylǵa jetkizýdiń nátıjesinde jergilikti xalyq úıden shyqpaı-aq, ózine qajetti qujatqa ózi tapsyrys berip, ony poshtamen aldyrta alady", - dep atap kórsetti mınıstr.
