Kólikterdi júktiń arasyna jasyryp Qyrǵyzstan asyrmaq bolǵan taǵy bir júrgizýshi ustaldy

JAMBYL OBLYSY. QazAqparat – 5 maýsym kúni shekarashylar júktiń arasyna jasyrylǵan avtokólikterdi zańsyz jolmen Qyrǵyzstanǵa alyp ótpek bolǵandardyń jolyn kesti, dep habarlaıdy QR UQK Shekaralyq baqylaý departamentine silteme jasap.

«Aısha bıbi» (Jambyl oblysy) avtokólik ótkizý beketinde júk kóligi tekserilip, qujattary joq «Deý» jáne «Hıýndaı» markaly eki jeńil kólikti taqtaılardyń arasyna jasyryp ótpek bolǵan júrgizýshi ustaldy», - delingen departament habarlamasynda.

Tabylǵan avtokólikter Jambyl oblysynyń Ekonomıkalyq tergeý departamentine tapsyryldy.

Mundaı qylmys osy aıda atalǵan avtokólik ótkizý beketinde ekinshi ret tirkelip tur.

Eske sala keteıik, 1 maýsymda Jambylda urlanǵan kólikti aǵash arasyna jasyryp, Qyrǵyzstanǵa apara jatqan júrgizýshi ustalǵan bolatyn.