Kólikter ózenge túsip ketpes úshin Kúrshimdegi muz ótkel jabyldy

KÚRShІM. QazAqparat - Shyǵys Qazaqstan oblysynyń Kúrshim aýdanynda muz ótkeldi jaýyp tastady, dep habarlaıdy QazAqparat.

Qazir ol jerge táýlik boıy jumys isteıtin beketter qoıylǵan.

Bul jaıynda aýdandyq ákimdiktiń Instagram paraqshasynda jarııalandy.

Jol qozǵalysy kezinde qaýipsizdikti qamtamasyz etip, avtokólikterdiń muz astyna túsip ketýine jol bermes úshin, sonymen qatar halyqtyń ómirin aman saqtaý úshin bul ótkel jabylady.

«Kúrshim aýdanynyń turǵyndary oblys ortalyǵyna parom arqyly bara alady. Sondaı-aq Kúrshim-Úlken Naryn-Altaı-Óskemen jolymen 387 shaqyrym jol júrip nemese Kúrshim-Qaljyr-Zaısan-Kókpekti-Qalbataý-Óskemen tasjolymen 676 shaqyrymdy eńserip, jete alady» delingen habarlamada.

Aıta keteıik, muz ústinde polıtseıler táýlik boıy kúzetip tur. Barlyq baǵytta júrýge tyıym salynǵan.