«Kólikter 2» mýltfılmi DVD jáne Blu-Ray formattarynda jaryqqa shyǵady
ASTANA. 18 qazan. QazAqparat - 1 qarasha kúni «Kólikter 2» mýltfılmi DVD jáne Blu-Ray formattarynda jaryqqa shyǵady. Bul aqparatty «Bolashaq» qaýymdastyǵynyń baspasóz qyzmeti taratyp otyr.
«22 qazan kúni «Kólikter 2» anımatsııalyq fılminiń súıikti keıipkerleriniń qazaq jáne orys tilderindegi fılmderi DVD jáne Blu-Ray formattarynda usynylatynyn qýana habarlaımyz. Metr, Naızaǵaı MakKýın men MakMıssl sizderdi Almaty qalasyndaǵy «Mega» saýda oıyn-saýyq ortalyǵynda kútedi. Olardy tek kórip qana qoımaı, shyn avtomobılderdiń ólshemine teń tańǵajaıyp keıipkerlerdiń janynda sýretke túsý múmkinshiligin jiberip almańyz», - delingen habarlamada.
Sonymen qatar qaýymdastyq baspasóz qyzmetiniń atap ótýinshe, aǵymdaǵy jyldyń 1 qarasha kúni «Kólikter 2» mýltfılmi DVD jáne Blu-Ray formattarynda jaryqqa shyqpaq.
Qaperińizde bolsyn, Disney - ǵajaıyp oqıǵalar oryn alatyn kınostýdııa. Anımatsııalyq fılmderdi jasaý barysynda kompanııa qyzmetkerleri fılmderdiń bilim berý jaǵyna da erekshe nazar aýdarady. Osyndaı fılmderdiń biregeı mysaly - búkil januıaǵa arnalǵan «Kólikter 2» mýltfılmi.
Esterińizge sala keteıik, aǵymdaǵy jyldyń 23 maýsymynda «Ýolt Dısneı» kompanııasynyń qazaq tilindegi alǵashqy jobasy - «Kólikter-2» mýltfılmi Qazaqstannyń 43 kınoteatrynda bir kúnde kórsetilgen bolatyn. Osylaısha qazaq tili álemdik áıgili «Ýolt Dısneı» kompanııasyndaǵy resmı dýblıajdyń 39-shy tiline aınaldy. Buǵan deıin túrki halyqtary ishinde Dısneı fılmderi tek túrik tilinde ǵana jaryq kórgen. «Kólikter-2» mýltfılmin qazaq tilinde dýblıajdaǵan ártisterdiń ishinde Baqytjan Álpeıisov, Kúnsulý Shaıahmetova, Dáýlet Ábdiǵaparov, Nyshanbek Jubanaev jáne Azamat Qanapııaev bar.
