Kóliktegi polıtsııa quqyq buzǵandarǵa 60 mln-ǵa jýyq teńgege aıyppul saldy
NUR-SULTAN. QazAqparat - Kólik polıtseıleri jyl basynan beri usaq buzaqylyq jasaǵan 900-den asa adamdy ákimshilik jaýapqa tartty. Bul týraly búgin QR ІІM Kóliktegi polıtsııa departamentiniń baspasóz qyzmeti habarlady.
Baspasóz málimetterine qaraǵanda, kKliktegi polıtsııa departamenti men onyń jelilik bólinisteriniń qyzmetkerleri kez kelgen quqyq buzýshylyqqa tózbeýshilik qaǵıdaty boıynsha júıeli jumys júrgizýde.
Ákimshilik polıtsııa basqarmasynyń málimeti boıynsha, aǵymdaǵy jyldyń basynan beri 31233 quqyq buzýshy ákimshilik jaýapqa tartyldy. 400-den asa adam ákimshilik qamaýǵa alynyp, 59 mln-ǵa. jýyq teńge kóleminde aıyppul salyndy.
«Sondaı-aq, quqyq buzýshylyqqa «múldem tózbeýshilik» qaǵıdaty boıynsha belsendi jumys júrgizilip, sonyń nátıjesinde, jalpy paıdalaný oryndaryn lastaý boıynsha 411, qoǵamdyq oryndarda alkogoldik ishimdikterdi paıdalanyp, masań kúıde bolǵany úshin 3788, tyıym salynǵan oryndarda temeki shekkeni úshin 2137, belgilenbegen oryndarda saýda jasaǵany úshin 2013, táýliktiń túngi ýaqyttarynda balalardyń úlkenderdiń ilesip júrýinsiz 274, belgilenbegen jerlerde temir jol ótkelderi úshin 15113 quqyq buzýshy jáne usaq buzaqylyq jasaǵany úshin 910 adam ákimshilik jaýapqa tartyldy»,-delingen habarlamada.
Sondaı-aq baspasóz qyzmetiniń derekteri boıynsha, qoǵamdyq oryndarda tıisý áreketi boıynsha 1461 adam ákimshilik jaýapqa tartylsa, onyń 222-si taksı júrgizýshisi.
Qabyldap-taratý oryndaryna turǵylyqty mekenjaıy joq 149 adam ornalastyrylyp, 420 adam medıtsınalyq aıyqtyrǵyshqa jiberilgen. Elimizdiń áýe jáne temir jol kóligi nysandarynan qańǵybastyq jáne qaıyrshylyq jasaǵan kámeletke tolmaǵan 100 jasóspirim beıimdeý ortalyqtaryna jetkizilip, ornalastyrylǵan.
«Jyl basynan beri kólik polıtseıleri 14176 jolaýshylar poezdaryna ilesip júrdi. Buǵan qosa, polıtseıler 349 birlesken aldyn alý is-sharasynn, 442 halyqpen jıyndar, 606 jolaýshylar poezdarynda kezdesýler jáne oqý oryndarynda 1060 dáris ótkizdi»,-dep málimdedi baspasóz qyzmeti.
