Kóliktegi polıtsııa departamentiniń basshysy halyqqa onlaın-esep berdi
NUR-SULTAN. QazAqparat – Búgin Kóliktegi polıtsııa departamentiniń bastyǵy polıtsııa polkovnıgi Ońal Bekeev halyqpen esep berý kezdesýin ótkizdi. Kezdesý departamenttiń Facebook jáne Instagram-daǵy resmı akkaýnttarynda onlaın rejıminde ótti. Dıalogqa jeliniń 600-den astam paıdalanýshysy qatysty, dep habarlaıdy QazAqparat.
Búgin Kóliktegi polıtsııa departamentiniń bastyǵy polıtsııa polkovnıgi Ońal Bekeev halyqpen esep berý kezdesýin ótkizdi. Kezdesý departamenttiń Facebook jáne Instagram-daǵy resmı akkaýnttarynda onlaın rejıminde ótti. Dıalogqa jeliniń 600-den astam paıdalanýshysy qatysty.
Óz sózinde Ońal Bekeev el Prezıdenti Qasym-Jomart Toqaevtyń ishki ister organdarynyń aldyna qoıǵan negizgi, ıaǵnı quqyq buzýshylyqtarǵa jol bermeý, azamattardyń quqyqtaryn qorǵaýdy qamtamasyz etý jáne polıtsııanyń qoǵammen ózara is-qımyl jasaýynyń tıimdiligi týraly tapsyrmalaryna basa kóńil bóldi.
O. Bekeev jurtshylyqty Kóliktegi PD-niń 2019 jyly atqarǵan jedel-qyzmet jumysynyń qorytyndylarymen tanystyrdy.
«Búgingi kúni departament qyzmetkerleri búkil respýblıka boıynsha kóliktegi quqyqtyq tártipti qamtamasyz etedi. Respýblıka aýmaǵynda 18 áýejaı, 1047 temirjol stantsııasy jáne 305 temirjol vokzaly ornalasqan», - dedi Ońal Bekeev.
Kólik polıtseıleri ótken jyly temirjol kóligi arqyly júrgen 20,5 mln jolaýshynyń jáne 15 mln áýe kóligi jolaýshylarynyń qaýipsizdigin qamtamasyz etti.
2019 jyly departamenttiń qyzmet kórsetý ýchaskesinde barlyǵy eki myńnan astam quqyq buzýshylyq tirkeldi. Jalpy qylmystardy ashý 72,9% qurady.
«Qoǵamnyń qoldaý kórsetýi biz úshin asa mańyzdy, sebebi qoǵammen ózara is-qımyl jasaý halyqtyń polıtsııaǵa degen senimin arttyrady, azamattarǵa ózderiniń qaýipsizdigin qamtamasyz etýge úlesterin qosýǵa múmkindik beredi» - dep atap kórsetti O.Bekeev.
Ol sonymen qatar,«Halyq únine qulaq asatyn memleket»tujyrymdamasyn ilgeriletý úshin Memleket basshysynyń qoıǵan mindetterin iske asyrý sheńberinde ótken jyly halyqpen 774 jıyn jáne jolaýshylar poıyzdarynda 1 myńnan astam kezdesý ótkizilgenin aıtty. Ártúrli máseleler boıynsha 132 azamat qabyldaýda boldy. Azamattarmen jumystyń bul túri halyqqa olardyń ótinishterine ýaqtyly ári sapaly jaýaptar alýlaryna múmkindik beredi. Buǵan qosa, 2019 jyly eki myńdaı ótinishter kelip túsken, olar boıynsha da ýaqtyly jaýaptar berildi.
«Ótken jyldyń basynda, Elbasynyń tapsyrmasy boıynsha Іshki ister organdaryn jańǵyrtý jónindegi 2019- 2021 jyldarǵa arnalǵan Jol kartasy ázirlendi, onda 9 baǵyt jáne 54 is-shara qamtylǵan. Búgingi kúni ol iske asyrylýda. Biz aýmaqtyq bólinisterimizdiń qurylymyn qaıta qarastyrýdamyz, barlyq kúsh-quraldar vokzaldarda, poezdarda jáne áýejaılarda, sondaı-aq basqa da kólik obektilerinde quqyq buzýshylyqtyń aldyn alýdy nyǵaıtýǵa baǵyttalǵan», – dedi Kóliktegi PD basshysy.
Departament bastyǵy baıandamasyn aıaqtaǵannan keıin, áleýmettik jelilerdiń paıdalanýshylary ózderin tolǵandyryp júrgen suraqtaryn qoıdy. Suraqtardyń kóbi jolaýshylar poıyzdarynda azamattardyń qaýipsizdigin qamtamasyz etýge, kóshi-qon zańnamasyna, temir joldardaǵy jazataıym oqıǵalarǵa jáne ishki ister organdaryna qyzmetke turýǵa nıet bildirgen úmitkerlerge qoıylatyn talaptar týraly jáne basqa da máselelerge qatysty boldy. Qoıylǵan barlyq suraqtarǵa Departament bastyǵy tolyqtaı jaýap berdi.
Tikeleı efır kezinde keıbir azamattar kólik polıtseılerine alǵystaryn da bildirdi. Bul polıtseıler jumysynyń jetistigi.
Óz kezeginde, bas kólik polıtseıi barlyq azamattarǵa belsendi qatysqandary úshin alǵysyn bildirip, kelip túsken ótinishter men usynystardyń qaraýsyz qalmaıtynyn sendirdi.
«Biz polıtseılerdiń jumysy qoǵamǵa túsinikti jáne ashyq bolýy úshin kóptegen jumystar atqarýdamyz. Búgingi sizdermen kezdesý tek qorytyndy shyǵarý úshin ǵana emes, sonymen qatar polıtseılerdiń halyqpen ózara jáne syndarly dıalogy úshin ótkizilip otyr», - dep túıindedi sózin polıtsııa polkovnıgi.
Kólik polıtsııasynyń aqparattyq ashyq bolýy úshin Departamenttiń ınternet-resýrsy, sondaı-aq azamattarǵa qajetti aqparat alýǵa múmkindik beretin Vkontakte, Feısbýk, Maıl.rý jáne Tvıtter sııaqty áleýmettik jelileri jumys isteıtinin eske saldy. Sondaı-aq Kóliktegi PD bastyǵynyń jeke ózi júrgizip, kún saıyn qarap otyratyn blogi jumys isteıdi. Osy jeliler boıynsha áýejáne temir jol kóliginiń jolaýshylary naqty ýaqyt rejıminde óz suraqtaryn, hattary men usynystaryn elektrondyq túrde joldaı alady.
