Kóliktegi polıtsııa departamenti bastyǵynyń eks-birinshi orynbasary sottaldy

TALDYQORǴAN. QazAqparat – Búgin Almaty oblysynyń Alakól aýdandyq soty QR ІІM Kóliktegi polıtsııa departamenti bastyǵynyń eks-birinshi orynbasary jáne «TEK-Qazaqstan» JShS-niń jumyskerlerine qatysty úkim shyǵardy. QazAqparat bul týraly QR Sybaılas jemqorlyqqa qarsy is-qımyl agenttiginiń Almaty oblysy boıynsha departamentine silteme jasap habarlaıdy.

Іs materıalyna sáıkes, QR Іshki ister mınıstrligi Kóliktegi polıtsııa departamenti bastyǵynyń birinshi orynbasary, polıtsııa polkovnıgi E.T. Bekenovke «TEK-Qazaqstan» JShS qyzmetkerleriniń zańsyz qyzmetine qamqorlyq jasady degen aıyp taǵylǵan bolatyn. JShS qyzmetkerleri aldyn ala kelisý arqyly adamdar tobymen 2018 jylǵy qańtar-qyrkúıek aralyǵynda «TEK-Qazaqstan» JShS «Dostyq» stantsııasynyń otyn qoımasynda saqtalǵan dızel otynyn jalpy somasy 354 mln teńgege urlaǵan. Keıinnen ony M.N. Toraıǵyrovqa tıesili Alakól aýdanynyń avtojanarmaı quıý stantsııalarynda satqan.

Sot úkimimen Kóliktegi polıtsııa departamenti bastyǵynyń birinshi orynbasary Erbol Bekenov laýazymdyq ókilettiligin asyra paıdalanǵany úshin 3 jyl 6 aıǵa bas bostandyǵynan aıyryldy.

Asa iri mólsherde bóten múlikti urlaýdy uıymdastyrǵan «TEK-Qazaqstan» JShS-ǵa tıesili Qostanaı jáne Dostyq stantsııalarynyń otyn qoımalarynyń basshylary Bolathan Qasenov pen Serik Áljanov 8 jylǵa bas bostandyqtarynan aıyryldy.

Budan bólek, Dostyq stantsııasynyń operator-janarmaı quıýshylary Erkin Álimbekov, Ǵalym Qudabaev, Meıirjan Qalybekov, Nurtaı Qaıyrov, Almas Ibragımov 7 jylǵa sottaldy.

Sondaı-aq Alakól aýdanynyń avtojanarmaı quıý stantsııasynyń ıesi Maqsut Toraıǵyrov túpnusqalyǵyn rastaıtyn qujattarsyz bótenniń múlkin asa iri mólsherde urlaýǵa jáne munaı ónimderin tasymaldaýǵa, satyp alýǵa, ótkizýge kómekteskeni úshin 7 jylǵa bas bostandyǵynan aıyryldy.

«Barlyq sottalǵan tulǵalar Alakól aýdandyq sotynyń zalynda qamaýǵa alyndy.

E.T. Bekenov ómir boıyna memlekettik qyzmette laýazymdardy atqarý quqyǵynan aıyryldy. Qalǵandary munaı jáne munaı ónimderin tasymaldaýmen, satyp alýmen, ótkizýmen, saqtaýmen aınalysatyn uıymdarda uıymdastyrýshylyq-ókimdik jáne ákimshilik-sharýashylyq fýnktsııalardy oryndaýǵa baılanysty laýazymdardy 10 jyl merzimge atqarý quqyǵynan aıyryldy», - dep tolyqtyrdy departamentten.