Kóliktegi ІІD: Ustalǵan qaıyrshylardyń 80 paıyzy - sheteldikter
ASTANA. QazAqparat - ІІM usynysy boıynsha Qazaqstan Respýblıkasynyń Ákimshilik quqyq buzýshylyq týraly kodeksine qoǵamdyq oryndarda qaıyrshylyqpen aınalysý, satyp alýmen, satýmen, seksýaldyq sıpatta qyzmetter kórsetýmen, ne ózge de qyzmetter kórsetýdi kúshtep tańýmen baılanysty mazalap ótinish bildirgeni úshin ákimshilik quqyq buzýshylyqtyń jańa quramy (449-bap «Qoǵamdyq oryndarda tıisý») engizildi.
Osy rette, tıisýdiń belsendi nysandary úshin jaýapkershilik tek ǵana azamattarǵa qatysty týyndaıtynyn atap ótý kerek. Atalǵan máseleni zetteý barysynda halyqaralyq tájirıbe men aǵymdaǵy ister jan-jaqty talqylandy, dep habarlaıdy Kóliketegi ІІD baspasóz qyzmeti.
Buǵan deıin Qazaqstanda osyndaı zańnamanyń bolmaýy qaıyrshylyqtyń beleń alýyna jáne elimizdiń aýmaǵyna ózge elderden qaıyrshylardyń aǵylýyna múmkindik berip keldi. Statıstıkalyq málimetter ustalǵan qaıyrshylardań 80% sheteldikter ekenin kórsetken. Nátıjesinde, barlyq memlekettik organdar ózara kelise otyryp jańa zańnamanyń erejelerine osy bap boıynsha qamaýǵa alý túrindegi jaýapqa tartý sharalaryn engizý, al sheteldikterdi QR aýmaǵynan tysqary shyǵaryp jiberý qajettiligi týraly biraýyzdan sheshim qabyldady.
«Zań kúshine engen kúnen bastap, Kóliktegi ІІD-niń qyzmetkerleri osy maqsatta temir jol vokzaldary men áýejaı ǵımarattarynda is-sharalar júrgizýde. Sonyń nátıjesinde QRÁQBtK 449-babyna sáıkes jeke tasymaldaý (taksı) qyzmetterin kórsetý boıynsha azamattarǵa mazalap ótinish bildirgeni úshin 3 zańbuzýshylyq faktisi anyqtaldy»,- deıdi Departamenttiń Ákimshilik polıtsııa basqarmasynyń bastyǵy Nurlan Sadyqov.
Onyń aıtýynsha, qaıyrshylyqpen aınalysqany úshin QR zańnamasyna sáıkes atalǵan quqyq buzýshylyqty alǵash ret jasaǵan adamdarǵa 5 AEK (9910 teńge) kóleminde, eger bir jyl ishinde qaıtalanǵan jaǵdaıda 10 AEK (19820 teńge) kóleminde aıyppul salynady, ne bes táýlikke deıingi merzimde ákimshilik qamaýǵa alý kózdeledi. Joǵaryda atalǵan áreketterdi shetel azamattary jasasa olardy QR aýmaǵynan tysqary shyǵarý, 5 táýlikke deıingi merzimde ákimshilik qamaýǵa alý kózdeledi.
Kóliktegi polıtseıleri azamattarǵa Qazaqstan Respýblıkasy zańnamasynyń barlyq talaptary men normalaryn saqtaýlary qajettigin eskertedi.
