Kóliktegi ІІD-de qylmysqa qarsy kúres boıynsha semınar-keńes ótti
ASTANA. 29 sáýir. QazAqparat - Kóliktegi ІІD-de «Kólik nysandarynda quqyqtyq tártipti qamtamasyz etýde departamenttiń jelilik organdarynyń qyzmetin uıymdastyrý,
sondaı-aq ákimshilik quqyq buzýshylyqtar jáne olardy jasaǵan adamdar týraly ortalyqtandyrylǵan derekter bankin paıdalaný týraly» semınar-keńes ótti.
Bul basqosýǵa QR ІІM Ákimshilik polıtsııa komıtetiniń qyzmetkerleri men QR Bas Prokýratýrasynyń Quqyqtyq statıstıka jáne arnaıy esepke alý komıtetiniń ókilderi jáne departamenttiń jelilik organdarynyń qyzmetkerleri qatysty, dep habarlady Kóliktegi ІІD baspasóz qyzmeti.
«Іs-sharanyń maqsaty - temir jol jáne áýe kóligi nysandarynda quqyq tártibin tıisti qamtamasyz etý úshin eskertý-aldyn alý sıpatyndaǵy sharalardy ázirleý jóninde usynymdar daıyndaý», dedi óz sózinde Kóliktegi ІІD bastyǵynyń orynbasary polıtsııa polkovnıgi Talǵat Ótetileýov.
Búgingi tańda Qazaqstannyń jańa ekonomıkasy men jańa áleýettik beınesin qalyptastyrýdyń qazirgi zamanǵy sharttary kólik júıesine joǵary sapaly qyzmet kórsetý men qaýipsizdikti nyǵaıtý boıynsha joǵary talaptar qoıyp otyr. Elbasymyz Nursultan Nazarbaevtyń tártipsizdikke múldem tózbeýshilik pen quqyq tártibin qamtamasyz etý máselelerine basa nazar aýdarýy da teginen-tegin emes. Memleket basshysy: «Usaq qylmysqa mán berilýi kerek. Ákimshilik jazalaýdyń aldyn alý kerek jáne ákimshilik jaza qabyldaý qajet. Kóshelerde barlyq usaq quqyq buzýshylar ustalýy tıis, olardyń barlyǵy da ózderiniń jazalanatynyn bilýi tıis. Sonda tártip bolady. Sonda úlken qylmystarǵa da jol berilmeıdi», - dep nyqtap aıtty.
Kóliktegi ІІD qyzmetkerleri temir jol nysandarynda qoǵamdyq tártiptiń saqtalýy men azamattardyń qaýipsizdigin qamtamasyz etý deńgeıin arttyrýǵa ishki ister organdarynyń basym mindetteri sheńberinde aýqymdy jumystar júrgizýde. «Jumysty uıymdastyrýdyń nysandary men ádisterin jetildirý boıynsha birqatar uıymdastyrýshylyq jáne tájirıbelik is-sharalar júzege asyrylýda», - dedi Talǵat Ótetileýov. Máselen, sońǵy ýaqytta eskertý-aldyn alý sıpatyndaǵy qabyldanǵan sharalar nátıjesinde kisi óltirý, tonaýshylyq tárizdi qylmystardy jasaýǵa jol berilgen joq. Bopsalaý faktileri aıtarlyqtaı tómendegen. Sol sııaqty temir jol vokzaldarynda jasalatyn qylmystardyń sany da azaıǵan. Polıtsııa polkovnıgi elimizdiń kólik saqshylarynyń aldynda áli de atqarylýy tıis aýqymdy jumystardyń turǵandyǵyn tilge tıek etti.
Semınar-keńeste qylmystardyń aldyn alýdaǵy ózekti máseleler jan-jaqty saralandy. Sondaı-aq, qylmystardy anyqtaý jáne ashý ádisteri, tótenshe jaǵdaılar, lańkestik faktileri týyndaǵan kezdegi qyzmetkerlerdiń áreketteri, shetel azamattarymen qarym-qatynas jasaý t.b. jaıttar talqylandy. Buǵan qosa, ákimshilik polıtsııa qyzmetkerleri semınar-keńeske qatysýshylarǵa quqyq buzýshylardy elektrondyq esepke alýdy engizý boıynsha tájirıbelik sabaqtar ótkizdi.
