Kóliktegi ІІD balalarǵa arnalǵan jańa jyl keshin uıymdastyrdy (FOTO)
ASTANA. QazAqparat - Jańa jyl kóńilge jańa úmitter uıalatyp, armandarǵa jeteleıtin, ásirese búldirshinder taǵatsyzdana kútetin qýanyshqa toly mereke.
Osy mereıli mereke qarsańynda Astanadaǵy M. Gorkıı atyndaǵy drama teatrynda Kóliktegi ishki ister departamenti qyzmetkerleriniń balalaryna arnalǵan jańa jyl keshi uıymdastyryldy.
Aınalasyna shyraı berip, ádemi bezendirilgen shyrshanyń mańyna toptasqan balalardy olardyń ortasyna kelip qosylǵan ertegi keıipkerleriniń qoıylymdary shat-shadyman kúıge bóledi.
Budan soń balalar bir-biriniń qoldaryn ustap, shyrshany aınalyp án salyp, bı bıledi.
Kópten kútken Aıaz ata men Aqshaqardy qoshametpen qarsy alǵan balǵyndar, olardyń saýaldaryna jarysa jaýap berdi.
Merekeniń bas keıipkeri búldirshinderdi jańa jylmen quttyqtap, jyly lebizderin bildirdi. Kóńildi keshte Aıaz atanyń qolynan syılyq alýǵa tyrysqan búldirshinder bar ónerlerin ortaǵa saldy.
Osylaısha qýanyshtan júzderi balbul janǵan balalardy Jańa jyl keshi ǵajaıyp qııaldarǵa toly ertegi álemine jeteledi, dep habarlaıdy Kóliktegi ІІD baspasóz qyzmeti.
