Kóliktegi bas sanıtar: Shetelde júrgen týrıster qazan aıyna deıin elge oralǵany jón

NUR-SULTAN. QazAqparat – QR Kóliktegi bas sanıtar dáriger Sádýaqas Baıǵabylov azamattarǵa qazan aıynyń basyna deıin shetelden elge oralýǵa keńes berdi, dep habarlaıdy QazAqparat tilshisi.

«Azamattarǵa aıtarym, shetelge shyqqysy kelip júrgender nemese shetelde júrgender qazan aıynyń basyna deıin Qazaqstanǵa oralǵany abzal. Bárimiz de aýrýdyń órshý yqtımaldyǵyn kútip otyrmyz. Shetelde qalyp qalmasa eken deımiz. Sebebi kún sýyǵan ýaqytta koronavırýs juqtyrý faktileri jıileýi múmkin», - dedi Sádýaqas Baıǵabylov.

QR Kóliktegi bas sanıtar dáriger sonymen birge otandastarymyzdyń bárin sanıtarııa talaptary men erejelerdi saqtaýǵa shaqyrdy.

«Saqtyq sharalary men áleýmettik qashyqtyqty ustaný kerek. Azamattar kóliktegi qaýipsizdik belbýi sekildi maska taǵyp júrýi tıis. Erejege baǵynbasa qıyn. Halyq máseleniń ózektiligin sezine otyryp, ózi úshin ǵana emes, týǵan-týystary, jaqyndary úshin jaýapty ekenin umytpaýy kerek», - dedi ol.