Kóliktegi bas prokýratýra mınıstrliktiń zańsyz buıryǵyn joıdy

NUR-SULTAN. QazAqparat – Kóliktegi bas prokýratýra Indýstrııa jáne ınfraqurylymdyq damý mınıstrliginiń buıryǵynan zańsyzdyq taýyp, kúshin joıdy, dep habarlaıdy QazAqparat tilshisi.

«Bas kólik prokýratýrasynyń qarsylyǵynan keıin Indýstrııa jáne ınfraqurylymdyq damý mınıstrliginiń 2021 jylǵy 8 maýsymdaǵy «jappaı qaýip» termınin anyqtaý jónindegi usynysty bekitý týraly» zańsyz buıryǵynyń kúshi joıyldy.

Bul buıryq Memleket basshysy shaǵyn bıznesti tekserýge jarııalaǵan moratorıdi aınalyp ótýge jáne avtomobıl, temirjol jáne sý kóligi salasyndaǵy kásipkerlerdiń qyzmetine negizsiz aralasýǵa ákelýi múmkin edi», - dep jazady quzyrly organnyń baspasóz qyzmeti.

Vedomstvonyń málimeti boıynsha, atalǵan aktide qyzmeti «jappaı qaýippen» baılanysty mıkro jáne shaǵyn kásipkerliktiń 45 túrinen turatyn tizbe bolǵan. Kólik quraldaryn tehnıkalyq tekserý, elektrondyq tahograf kartasyn daıyndaý jáne berý, taksı qyzmetterin kórsetý sııaqty bıznestiń bastalǵany týraly habarlamaý da «jappaı qaýip» retinde sıpattalǵan.

«Bul quqyqtyq akt sany sheksiz kásipkerlerdiń múddelerin qozǵaǵanyna qaramastan, ádilet organdarynda da tirkeýden ótpedi. «Quqyqtyq aktiler týraly» Zańnyń 19 jáne 51-baptary boıynsha, mundaı aktilerdi memlekettik tirkeý olardyń kúshine enýiniń qajetti sharty bolyp tabylady. Kóliktegi kásipkerlerdiń kez kelgen quqyqtaryn buzý týraly vedomstvoda Bas kólik prokýratýrasynyń mobıldi tobyna habarlaýdy suraıdy: 8 7172 712251, 8 7172 301910 jáne 8 701 990 06 65», - delingen bapasóz qyzmetiniń málimetinde.