Kóliktegi Bas memlekettik sanıtarlyq dáriger: Ushaqta maska rejımin saqtaý kerek
NUR-SULTAN. QazAqparat - Kóliktegi Bas memlekettik sanıtarlyq dáriger Sádýaqas Baıǵabylov qazaqstandyqtardy ushaq bortynda áleýmettik qashyqtyq pen maska rejımin saqtaýǵa shaqyryp, tártip buzýshylarǵa aıyppul salynatynyn eske saldy, dep habarlaıdy QazAqparat.
Otandyq jáne sheteldik áýe kompanııalary ushaqtarda qaýipsizdik júıesiniń tolyq saqtalýyna múddeli. Alaıda, qazaqstandyq azamattar ushaq bortynda karantın talaptaryn saqtamaı, sol arqyly qaýipti jaǵdaıdyń oryn alýyna jol berip otyr.
Mysaly, búgin áýe kemesiniń bortyna minerde maska taǵýdan bas tartqan eki jolaýshy 30 AEK (83 340 teńge) kóleminde aıyppul tóleý túrinde ákimshilik jaýapkershilikke tartylǵan.
Sondaı-aq, aýrý juqtyrý qaýpi áýe kemesiniń ishinde, jolaýshylardyń salonnan tezirek túsý úshin kezekke turatyn kezde ornaýy múmkin.
Negizinen, áleýmettik qashyqtyq tirkeý kezinde, ushaqqa minerde saqtalyp, ushaq bortynda saqtalmaıdy. Sheteldik áýe kemesinde jolaýshylar ushaqtan shyǵý kezegin saqtap otyrady.
Bizdiń elimizdiń turǵyndarynan jolaýshylardyń ushaq bortynda áleýmettik qashyqtyqty saqtamaıtynyna baılanysty kóp shaǵym túsedi.
Osy aptada ushaqtan shyǵý kezinde áleýmettik qashyqtyqty saqtamaıtyn jolaýshylarǵa aıyppul salý kúsheıtiledi.
