Kólikshiler odaǵy Kólik mınıstrliginen joldarda oıdym shuńqyrlar bolmaýyn qadaǵalaýdy surady
ASTANA. QazAqparat - QR Kólikshiler odaǵy Qazaqstanǵa respýblıka aýmaǵy boıynsha zańsyz tasymaldaýdy júzege asyratyn shetel operatorlarynyń aǵylyp kelýinen qaýiptenýde.
Bul qaýip birinshi kezekte Qazaqstanda kólikterdi baqylaıtyn statsıonarlyq posttardyń jabylýyna baılanysty bolyp otyr. Ótken jyldan bastap QR KKM Kóliktik baqylaý komıteti statsıonarlyq posttardy júrip kele jatqan kólik salmaǵyn avtomatty túrde ólsheıtin elektrondyq túrge aýystyrǵan. Nátıjesinde elde kólikti baqylaıtyn 11 statsıonarlyq post jabylyp, 13 elektrondyq tarazy iske qosyldy. Aǵymdaǵy jyly olardyń sany 31-ge deıin arttyrylmaq, odan ári 80-ge deıin jetkizý kózdelip otyr.
«Birinshi kezekte elektrondyq tarazynyń bıznes turǵysynan artyqshylyǵy - tasymaldaýshylardy tekseretin organdarmen baılanystyń bolmaýynda. Bizge barlyq josparlanǵan tarazylardy ornatýymyz úshin joldarda oıdym shuńqyrlardyń ásirese, jappaı tasymaldaý jandanatyn jaz aılarynda bolmaǵany asa mańyzdy», - dep atap ótti KAZLOGISTICS Qazaqstan Kólikshiler odaǵynyń bas dırektory Erhat Esqalıev.
Ol sondaı-aq sheteldik kólikpen tasymaldaýshylardyń ruqsat qujattaryn baqylaý qajettigi týraly aıtyp ótti.
Óz kezeginde QR KKM Kóliktik baqylaý komıtetiniń tóraǵasy Áset Asaýbaev QR-da ruqsat qujattaryn obektıvti joıý maqsatynda sheteldik kólik tasymaldaýshylary úshin qorǵanysh deńgeıi joǵary jańa ruqsat berý blankisi shyǵarylǵanyn aıtty. Sondyqtan, endi ruqsatty qaıtadan paıdalanýǵa jol bermeý úshin blanktiń jyrtylmaly bóliginiń bolýy qarastyrylǵan.
