Kólikke ruqsat etilgen salmaqtan artyq júk artqany úshin salynatyn aıyppul tómendedi
ASTANA. QazAqparat - 9 qańtarda kólik salasyna qatysty QR Ákimshilik quqyq buzýshylyqtar kodeksine engizilgen ózgertýler men tolyqtyrýlar kúshine endi, dep habarlaıdy QR IDM baspasóz qyzmeti.
Engizilgen ózgertýlerge sáıkes, avtokólik quraldarynyń artyq salmaqpen júrip ótkeni úshin ákimshilik aıyppul 10-20 AEK-ke tómendedi. Budan bólek, mundaı quqyq buzýshylyq jaýapkershiligi endi bir tonnadan asqan kezde kúshine enedi.
Qazaqstandyq ruqsat blankisiz halyqaralyq tasymal jasaǵan úshin sheteldik júrgizýshilerge 25-ten 200 AEK-ke deıin aıyppul salynatyn bolady. Sonymen birge, QR terrıtorııasynda kabotajdy tasymal jasaǵan úshin sheteldik tasymaldaýshylarǵa 100 AEK mólsherinde aıyppul belgilendi.
Sonymen qatar, tómendegideı jańa ákimshilik jaýapkershilik engizildi:
- Temirjol kóligimen júkterdi, jolaýshylardy, bagajdy jáne aýyr júkti tasymaldaý erejelerin buzǵan úshin (571 baptyń jańa 4-shi bólimi);
- Tasymaldaýshy júkti, jolaýshylardy jáne bagajdy avtokólik quralymen tasymaldaý kezinde taýar-kólik jóneltpe qujatyn, (ólsheý jáne tarazylaý akti), júk tasymalyn jasaýda jol-sapar paraǵyn bermeý jáne toltyrmaý (571-1 jańa bap);
- EEO múshe-memleketterdiń kólikti baqylaý ýákiletti organy bergen eskertpeni oryndamaı halyqaralyq avtomobıl tasymalyn jasaǵan sheteldik tasymaldaýshylar úshin, sonymen qatar eskertý hatta belgilengen baǵdardan aýytqyǵany úshin (573 baptyń 6 bólimi);
- Tartqyshty nemese júk avtomobılin tasymaldaýshy tirkelgen memlekette tirkelmegen tartqyshqa nemese júk avtomobıline aıyrbastaýdy (tirkemeleý) júzege asyrǵany úshin (573 baptyń 7 bólimi);
- Shaǵyn kólemdi kemede nemese býksırge alynǵan júzý quralynda qutqarý quraldaryn kımeı jáne taqpaı jeke shaǵyn kólemdi kememen basqarý úshin.
Kodeksten 593-baptyń 6-bóligi (samosvalmen tasymaldaý), 574-bap (jolaýshylar tiziminiń bolmaýy), 576-bap (júrgizýshilerde turaqsyz respýblıka ishinde tasymal jasaý shartynyń bolmaýy), 584-baptyń 1 bóligi (sýǵa súńgý jumystary kezinde belgi berý erejelerin buzǵan úshin), 609-bap (arnaıy kýáliksiz jolaýshylardy tasymaldaý) alynyp tastalǵan.
