Kólik jyldamdyǵyn asyrý saldarynan myńnan astam jol-kólik oqıǵasy boldy - ІІM

NUR-SULTAN. QazAqparat – Sońǵy 7 aıda elimizde jyldamdyqty asyrý sebebinen 1 136 jol-kólik oqıǵasy tirkeldi. Bul týraly QR Іshki ister mınıstrligi Ákimshilik polıtsııa komıteti tóraǵasynyń mindetin atqarýshy Jandos Muratálıev málim etti, dep habarlaıdy QazAqparat tilshisi.

«Jol-kólik oqıǵalarynyń belgili bir bóligi jyldamdyqty elemeıtin júrgizýshilerdiń kesirinen bolady. Árbir jetinshi apat (14%) júrgizýshilerdiń eldi mekende belgilengen jyldamdyqty saqtamaýynan bolyp jatady. Jol-kólik oqıǵalarynda mert bolǵandardyń jalpy sanynda árbir jetinshisiniń (13%) ómiri osy sebepten qıylady jáne árbir jetinshi (14%) jaraqat alady», - dedi J. Muratálıev mınıstrlikte ótken brıfıngide.

Onyń aıtýynsha, sońǵy 7 aıda osy jyldamdyqty asyrý sebebinen 1 136 jol-kólik oqıǵasy tirkelgen. JKO saldarynan 156 adam qaıtys boldy jáne 1 442 adam jaraqat aldy.

Budan buryn habarlanǵandaı, 2022 jyly Qazaqstanda jol-kólik apattary kóbeıdi.