Kólik júıesin damytýǵa qatysty zańnamalyq qujatqa túzetý engizilmek

ASTANA. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.

Atalǵan zań jobasy 2022 jylǵy 25 mamyrda birinshi oqylymda maquldandy.

Májilistiń Ekonomıkalyq reforma jáne óńirlik damý komıtetiniń málimetinshe, atalǵan qujatty qaraý kezinde tıisti tolyqtyrýlar jasaldy.

Zań jobasyn qarastyrý kezinde depýtattar:

- jolaýshylar tasymalyn qoldaýǵa baǵyttalǵan ýaqytsha teńgerimdeýshi tólem tóleýdi júzege asyrýǵa;

- jol júrý qujattaryn (bıletterdi) satýdy jáne temirjol kóligindegi oryndardy rezervke saqtaýdy ortalyqsyzdandyrýǵa;

- avıatasymaldaýshynyń kinásinen bolǵan áýe kóligimen tasymaldaýdy keshiktirýdiń árbir saǵaty úshin jolaýshylarǵa aıyppul tóleýge;

- keıinnen tasymaldaýshylar jolaýshylarǵa óz esebinen qonaq úıden oryn jáne tamaq beretin, reıster keshiktirilgen kezde kútý saǵattarynyń sanyn qysqartýǵa;

- Qazaqstan Respýblıkasynan shyǵý kezinde avtomobıl ótkizý pýnktterine júk kólik quraldarynyń kirý ýaqytyn brondaý úshin avtomattandyrylǵan elektrondyq kezek júıesin engizýge baǵyttalǵan túzetýler engizdi.

Budan basqa, «Jer qoınaýy jáne jer qoınaýyn paıdalaný týraly» QR Kodeksine erekshe jaǵdaılar beriletin kúrdeli jobalar (teńiz jáne gaz jobalary, qurlyqtaǵy kúrdeli jobalar) úshin jaqsartylǵan modeldik kelisimshartty bekitý jóninde túzetýler qamtyldy.