Kólik júrgizýshisiniń temeki shegýine tyıym salynýy múmkin
ASTANA. QazAqparat - Kólikti júrgizip kele jatqanda temeki shegýge tyıym salynýy múmkin. Búgin Májilistiń jumys tobynda «Jol júrisi týraly» QR Zańyna ózgerister men tolyqtyrýlar engizý týraly» zań jobasyn talqylaý barysynda depýtat Omarhan Óksikbaev osyndaı usynys jasady.
«Júrgizýshi rýlde otyryp temeki shegýge oqtalyp, alańdasa, ol jolǵa nazary tómendeıdi, reaktsııa da aqyryndaıdy. Al temeki shegý barysynda qolynan shylymy túsip ketýi de múmkin. Ony alýǵa da alańdaıdy, tipti shegý protsesiniń ózi adam mıyna belgili bir áser etetini anyq», - deıdi depýtat Omarhan Óksikbaev.
Sonymen qatar, depýtat qoldanystaǵy zań normalary boıynsha kólik júrgizý barysynda telefonmen áńgimelesýge tyıym salynǵanyn eskertti. «Al temeki shekkenniń telefonmen sóıleskennen artyqshylyǵy ne? Munda da nazaryn eki jaqqa aýdarýǵa soqtyryp tur emes pe? Búgingi baıandamada jol apatynan jylyna úsh myń adamǵa deıin qaza bolatyny aıtyldy. Dál qandaı zań buzýshylyqtar boıynsha ólim-jitim kóp ekeni týraly statıstıkanyń joqtyǵy ókinishti. Dese de, kez kelgen máselede azamattar men olardyń qaýipsizdigi birinshi kezekte bolýy kerek. Bul da joldaǵy apatty azaıtýǵa oń serpin beredi dep oılaımyn», - dedi depýtat Óksikbaev.
