Kólik júrgizýshisinen «qaıyr suraǵan» arnaıy jasaq qyzmetkeri jumystan qýylady
PAVLODAR. QazAqparat – Pavlodar oblysyndaǵy blokpostta júk kóliginiń júrgizýshisinen para suraǵan Arnaıy jedel áreket etý jasaǵynyń qyzmetkeri jumystan bosatyldy, dep habarlaıdy QazAqparat tilshisi.
Áleýmettik jelilerde Germanııadan Semeıge ketip bara jatqan júk kóligi júrgizýshisinen arnaıy jasaq qyzmetkeriniń para surap turǵany týraly vıdeo tarap ketken edi.
«2020 jyldyń 12 sáýirinde «Telegram» áleýmettik jelisine júrgizilgen monıtorıng barysynda Germanııadan Semeıge ketip bara jatqan júrgizýshiniń vıdeosy tarap ketti. Ol Ekibastuz aýdanynyń Shiderti kentindegi №4 sanıtarlyq post arqyly ótken. Atalǵan vıdeo boıynsha Polıtsııa departamentiniń bastyǵy Nurlan Másimov oblystyq PD jeke qaýipsizdik basqarmasyna qyzmettik tekserý júrgizýdi tapsyrdy», - dep habarlaıdy Pavlodar oblysynyń polıtsııa departamentinen.
Nurlan Másimovtyń aıtýynsha qyzmetker jumystan qýylady.
«Arnaıy jasaq qyzmetkeri sózsiz ishki ister organdarynan bosatylady», - dedi ol.
Sonymen qatar onyń ústinen QR ÁQBK 449-baby boıynsha (qaıyr suraý) ákimshilik is qozǵaldy. Kásibı turǵyda álsiz adamdardy jınap alǵan komandıriniń laýazymynda qalý-qalmaý máselesi sheshilýde.
