Kólik júrgizýshilerin onlaın oqytý joıylmaýy múmkin

ASTANA. QazAqparat – Іshki ister mınıstri Marat Ahmetjanov júrgizýshi kýáligin onlaın oqý arqyly berý máselesine qatysty pikir bildirdi, dep habarlaıdy QazAqparat tilshisi.

«Júrgizýshilerdi onlaın oqytýdy toqtatý máselesi qazir talqylanyp jatyr. Taldaý júrgizip jatyrmyz. Sheshim ǵylymı negizge súıene otyryp qabyldanýy tıis. Onlaın oqytýdy birden alyp tastaý qarsylyq týdyryp, keri áser etýi múmkin. Árıne, júrgizýshi kýáligin berý boıynsha talapty kúsheıtemiz. Emtıhandy bógde kisilerdiń tapsyrǵan faktisi tirkeldi. Sondyqtan máseleni bir jaqty emes, keshendi túrde qarastyrý qajet», - dedi Marat Ahmetjanov Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń aıtýynsha, atalǵan máselege qatysty sheshim qabyldaýda qoǵam pikiri eskeriledi.

«Osyǵan deıin qabyldanǵan sharalar júrgizýshi kýáligin berýdi qaıta qaraýǵa basqa da sebepterdiń baryn kórsetip otyr. Biz olardy joıamyz. Múmkin onlaın oqýdy qaldyrý kerek shyǵar, sebebi ortalyqqa baryp oqý bárine birdeı yńǵaıly emes. Degenmen talapty buzǵandarǵa neǵurlym qatań sharalar qabyldanady. Sol sııaqty avtokólikterdi tehnıkalyq baıqaý máselesi boıynsha kólikterdi zańdastyrý aıaqtalǵannan keıin tıisti sharalar qabyldanbaq», - deıdi ol.

Aıta ketsek, tańerteń elimizde kólik júrgizýshilerin onlaın oqytý joıylatyndyǵy týraly habarlaǵan edik.