Kólik júrgizýshileri jaýapty bola bastady-zertteý
ASTANA. QazAqparat - Qazaqstandyq kólik júrgizýshileri barynsha jaýapty ári sanaly bola tústi. Saqtandyrý, onyń ishinde erikti saqtandyrý kólemi de artyp, jol-kólik oqıǵalarynyń sany qysqarýda. Mundaı qorytyndyǵa sarapshylar kelip otyr, dep jazady ranking.kz portaly.
«2018 jyldyń qańtar-maýsymynda azamattyq-quqyqtyq jaýapkershilikti mindetti saqtandyrý segmentinde jınalǵan syıaqynyń jalpy kólemi 31,6 mlrd teńgeni qurady. Bul ótken jyldyń birinshi jartyjyldyǵyndaǵy kórsetkishten 28,9 paıyzǵa artyq. Buǵan qosa, saqtandyrý tóleminiń kólemi 2,4 paıyzǵa, ıaǵnı 12,1 mlrd teńge deıin qysqardy», - delingen atalǵan aqparatta.
Sonymen qatar, kólik júrgizýshileriniń joldaǵy óz jaýapkershilikterin sezinetindigi, ózin jáne jol qozǵalysynyń ózge qatysýshylaryn qaýipsizdendirýge tyrysatyndyǵy atalyp ótilgen.
Máselen, 2017 jyly 17 myń jol-kólik oqıǵasy tirkeldi. Bul 2016 jylmen salystyrǵanda 5,3 paıyz az. 2017 jyly oryn alǵan jol apattarynyń 28,9 paıyzy jyldamdyqty asyrýdan, 13,6 paıyzy jaıaý júrginshi ótkelinde bolǵan oqıǵalardan turady.
