Kólik júrgizýshileri aqyly jol qunyn tólemeý úshin qandaı aılaǵa barady
NUR-SULTAN. QazAqparat – «QazAvtoJol» ulttyq kompanııasy aqyly joldar dırektsııasynyń eksplýatatsııa júıesi bóliminiń basshysy Madııar Aıtbaev keıbir júrgizýshiler aqyly jol qunyn tólemeı ótý úshin qandaı áreketterge baratynyn aıtyp berdi, dep habarlaıdy QazAqparat tilshisi.
«1403 Call-ortalyǵynyń qyzmetkerleri 24/7 rejıminde jumys isteıdi. Bizdiń mamandar jolǵa qatysty barlyq óńirden kelip túsken saýaldarǵa táýlik boıy jaýap beredi. Sonymen qatar ortalyq qyzmetkerleri aqyly joldardaǵy kólik qozǵalysyn onlaın baqylap otyrady. Maqsat – jolaýshylardyń qaýipsizdigin qamtamasyz etý jáne zańbuzýshylyqqa jol bermeý. Aqyly joldarda tártipti buzatyn júrgizýshiler de bar. Mysaly, aqyly jol beketinen ótken kezde avtomobıldiń nómirin jasyrady. Osylaısha kólik ıesi tegin júrgisi keledi. ıAǵnı nómirdi jasyrǵan jaǵdaıda foto jáne beınebaqylaý kamerasy kólikti tolyq anyqtaı almaıdy», - dedi Madııar Aıtbaev atalǵan kompanııa uıymdastyrǵan BAQ ókilderine arnalǵan baspasóz týrynda.
Onyń aıtýynsha, jol aqysyn tóleý beketine jetkende kólik nómirin sheship alatyn júrgizýshiler de bar.
«Árıne, bizdiń mamandar zań buzýshylyqqa jol bermeıdi. Tártipbuzýshylyq bolǵan jaǵdaıda kólik ıesin anyqtap, jol aqysyn tóleý kerektigin eskertedi. Aqyly jol qunyn tólemeı júrgisi keletin júrgizýshiler barshylyq», - deıdi ol.
Sondaı-aq, «QazAvtoJol» ulttyq kompanııasy usynǵan derekke súıensek, «1403» call-ortalyǵynyń qyzmetkerleri 3 jyldyń ishinde azamattardan kelip túsken 230 myńǵa jýyq ótinishti qarastyrǵan.
