Kólik júksalǵyshyna jasyrynyp blokposttan ótpek bolǵan azamat ustaldy
NUR-SULTAN. QazAqparat - Qaraǵandy oblysynda avtokóliktiń júksalǵyshyna jasyrynyp, blokposttan ótpek bolǵan taǵy bir azamatty qolǵa túsirdi, dep habarlaıdy QazAqparat tilshisi Polisia.kz saıtyna silteme jasap.
Taratylǵan aqparatqa qaraǵanda, 26 sáýir kúni Qaraǵandy oblysyna qarasty Abaı aýdandyq polıtsııa basqarmasy Topar polıtsııa bóliminiń polıtsııa qyzmetkerleri qyzmetterin atqarý barysynda «Ońtústik» karantın blokpostynda Qaraǵandy qalasynyń 47 jastaǵy turǵyny júrgizip kele jatqan «Toyota Land Cruiser» kóligin toqtatqan. Kólik júrgizýshisi posttan kedergisiz ótýge tyrysqan. Avtomobıldi tekserý barysynda júksalǵyshta jasyrynyp, blokposttan zańsyz ótpek bolǵan 35 jastaǵy azamat ustaldy.
Karantın rejımin buzǵan eki azamattyń da ústinen QR Ákimshilik quqyq buzýshylyq týraly kodeksiniń 476-baby 6-tarmaǵy boıynsha ákimshilik hattama toltyrylyp, materıal sotqa jiberildi.
Aıta keterligi, bir apta ishinde Qaraǵandy oblysyndaǵy blokposttar arqyly adamdy zańsyz alyp ótýge tyrysqan úshinshi derek tirkelip otyr. Buǵan deıin mundaı eki jaıt Buqar jyraý aýdanyna qarasty Mustaın aýylyndaǵy blokpostta oryn alǵan edi.
