Kólik jasaımyz dep ózimizdi aldamaı-aq qoıaıyqshy - Qulybaev

ASTANA. QazAqparat - «Atameken» UKP prezıdıým tóraǵasy Tımýr Qulybaev «kólik qurastyrýǵa» maldanbaı, naǵyz «kólik jasaýǵa» úndep otyr. Onyń aıtýynsha, ózimizde kólik bólshekterin shyǵaratyn óndirister bar. Solardyń jumysyn jandandyrý qajet, dep habarlaıdy QazAqparat tilshisi.

«Shyny kerek, qazir elimizge kólik bólshekteri jetkizilgennen keıin biz ózimizdi aldaı bastaımyz. Elektrenergııany, temirjol shyǵyndaryn, kommýnaldyq tólemder men jumysshylardyń jalaqysyn sanaımyz da, mine, mynaý bizdiń lokalızatsııamyz (qazaqstandyq qamtý - avt.) deımiz. Paıyzdyq kórsetkishin de kórsetip qoıamyz. Joq, bul lokalızatsııa emes. Ol úshin kólik bólshekterin ózimiz shyǵarýymyz qajet», - dedi Qulybaev búgin prezıdıýmnyń keńeıtilgen otyrysynda. Osy oraıda uıym jetekshisi Ózbekstannyń kólik óndirisin mysalǵa keltirdi. Búginde ol jaqta shyny da, plastmass ta, qajetti bólshekter de jasalady. Naǵyz lokalızatsııa osy.

«Bizde lokalızatsııa emes, kólik qurastyrý ǵana. Soǵan qaramaı, mashına jasaý salamyz ósip jatyr dep, dep ózimizdi jubatyp otyramyz», - dep atap kórsetti prezıdıým basshysy.

Budan bólek, Palata basshysy aýyl sharýashylyǵy texnıkasynyń lokalızatsııasyn arttyrý qajet dep sanaıdy.

«Qazir aımaqtardy aralaǵanda árbir ákim kombaın shyǵaramyn dep maqtanady. Bir jerge barsań, bir modeldi kórsetedi, ekinshi jerde taǵy bir model, úshinshisi de óz modelin shyǵarady. Bazalyq bir modeldi shyǵarsaq ta, jetpeı me? Bireýin tańdaıyq. Sosyn onyń qosymsha bólshekterin shyǵaraıyq. Qyzmet kórsetý ortalyqtaryn ashaıyq», - dedi Tımýr Asqaruly.