Kólik jáne kommýnıkatsııa mınıstrliginde avtojoldarda kólik qatynasyn qamtamasyz etý máselesi jóninde keńes ótti
ASTANA. 9 qańtar. QazAqparat - 2012 jylǵy 9 qańtarda QR Kólik jáne kommýnıkatsııa mınıstri Berik Kamalıev avtomobıl joldaryn qysta kútip ustaý jáne respýblıkalyq avtojoldardaǵy jol qatynasynyń aǵymdaǵy jaǵdaıy jaıly keńes ótkizdi, dep habarlady mınıstrliktiń baspasóz qyzmeti.
Keńeske «Qazavtojol» RMK jáne onyń fılıaldary, avtomobıl joldary komıtetiniń oblystyq departamentteriniń basshylary qatysty.
Máseleni talqylaý barysynda jol qozǵalysynyń qatysýshylaryn joldaǵy jaǵdaı týraly aqparattandyrý úshin «Qazavtojol» RMK aýa raıy týraly («Qar», «Jańbyr», «Tuman», «Boran», «Kóktaıǵaq», «Jyldamdyqty shekteý») aqparat aýysyp turatyn 33 jaryqdıodty jol belgilerin satyp alyp, olardy ornatýǵa kiristi.
Kún saıyn «Qazavtojol» RMK saıtynda respýblıkalyq joldardyń operatıvti jaǵdaıy týraly aqparat ornalastyrylady. Aýa raıynyń qolaısyzdyǵynan jabylǵan kúrdeli jol ýchaskelerin kórsetip turatyn vıdeotúsirilimderdi kórsetý tájirıbesi engizilgen.
23,5 myń km joldyń 3,3 myń km (14%) qar kóbirek shoǵyrlanatyn ýchaskeler bolyp tabylady. 53 myń qýma metr qar toqtatatyn ýaqytsha qalqandar ornatyldy, qardan qorǵaıtyn 4 myń km orlar qazyldy, qardan 22 km tosqaýyl qabyrǵalar turǵyzyldy.
Shyǵys Qazaqstan oblysynda jol-eksplýatatsııalyq qyzmetindegilerge joldy qardan tazartý barysynda, sondaı-aq, kólik júrgizýshileri aýa raıynyń qolaısyz kezinde (qar, boran, joldyń nashar kórinýi) baǵyt-baǵdaryn aıyryp otyrý úshin 3 myńnan astam boıalǵan aǵash belgilerin ornatý jumystary atqarylýda.
Búgingi kúni respýblıkalyq mańyzy bar avtomobıl joldarynda jol qatynasyna shekteý joq.
Keńesti qorytyndylaı kele, B.Kamalıev avtomobıl joldary komıtetiniń oblystyq departamentteri, sondaı-aq, «Qazavtojol» RMK fılıaldarynyń basshylaryna aldaǵy saılaýǵa ázirlik, ony ótkizý jáne qorytyndy júrgizý kúnderi respýblıkalyq jáne jergilikti mańyzy bar barlyq avtomobıl joldarynda qatynas ornatýdy qamtamasyz etý úshin qajetti barlyq tıisti sharalardy iske asyrýdy tapsyrdy. Ol úshin salanyń barlyq tehnıkasy men adamı resýrstaryn jumyldyrý qajet.
