Kólik jáne kommýnıkatsııa mınıstrliginde astyq tasymaldaý jospary talqylandy
ASTANA. 14 qazan. QazAqparat - Búgin Kólik jáne kommýnıkatsııa mınıstri Berik Kamalıev astyqty tasymaldaý máselesi boıynsha selektorlyq keńes ótkizdi,
dep habarlady atalǵan vedomstvonyń baspasóz qyzmetinen.
Alqaly jıynǵa elimizdiń Aýyl sharýashylyǵy mınıstri Asyljan Mamytbekov, sondaı-aq, «Qazaqstan temir joly» UK» AQ, «Azyq-túlik kelisimshart korporatsııasy» UK» AQ, «QazAgro» AQ jáne «Qazaqstannyń astyq odaǵy» ZTB basshylary, Qostanaı, Soltústik Qazaqstan jáne Aqmola oblystary ákimdikteriniń basshylary qatysty.
Keńesti ashqan B.Kamalıev atalǵan másele 27 qyrkúıek kúni selektorlyq keńeste qaralǵanyn, QR Premer-Mınıstri K.Másimov astyq tasymalyn tolyq qamtamasyz etý jóninde sharalar qabyldaýdy tapsyrǵanyn basa aıtty. Aǵymdaǵy jyly jańa astyqtyń kólemi eń rekordty kórsetkishterge jetti. Osyǵan oraı, astyqty ýaqtyly tasymaldaýdyń problemalyq máseleleri týyndap otyr. Osy rette mınıstr astyqty tasymaldaýda, saqtaýda jáne kádege jaratýda olqylyqqa jol bermeý úshin kelisilgen jumystardy atqarý búgingi qatysýshylardyń ortaq mindeti bolyp tabylatynyn atap kórsetti.
QR Aýyl sharýashylyǵy mınıstri aǵymdaǵy jyly kútiletin astyqtyń joǵary kólemi shamamen 23-23,5 mln. tonnany quraıtynyn aıtty. Eksporttyq áleýet - 10 mln. tonnadan asady. Osyǵan oraı, ishki naryqta sáıkessizdikti boldyrmaý úshin respýblıka ishinde 2,5-3 mln. tonna astyq tasymalyn eseptegende shamamen 12,5-13 mln. tonna astyqtyń tasymalyn qamtamasyz etý qajet.
Astyqty óńirlerden elevatorlyq qýattardy bosatý maqsatynda «Azyq-túlik kelisimshart korporatsııasy» UK» AQ 500 myń tonna kóleminde astyq tasymalyn júrgizýde. Aǵymdaǵy jylǵy 14 qazandaǵy jaǵdaı boıynsha 293 myń tonna nemese 59 paıyz astyq jóneltilgen, onyń ishinde, Aqmola oblysynda - 81 myń, Qostanaı oblysynda - 93 myń, Soltústik Qazaqstan oblysynda - 119 myń tonna. Sondaı-aq, memlekettik qordaǵy astyqtan basqa agroónimdik sýbektiler kesheni memleket ishinde 470 myń tonna astyq tasymaldady.
Astyq tasymaldaıtyn júk vagondarymen qamtamasyz etý jáne qosymsha vagondardy tartý qajettiligi jóninde «Qazaqstan temir joly» UK» AQ vıtse-prezıdenti Ermek Qızatov baıandady.
Keńes qorytyndysy boıynsha, qosymsha astyq tasymaldaıtyn júk vagondaryn tartý jumysyn shıratyp, problemalyq máselelerdi jedel túrde sheshý qajettiligi jaıly sheshim qabyldady. Onyń ishinde, eksportqa jáne respýblıkamyzdyń ishinde astyqty tıeý barysyn jedeldetý, qosymsha 5,7 myń vagon tartý qajettiligi atap ótildi. Astyq tasymaldaıtyn júk vagondary jetispegen jaǵdaıda, jabyq jáne ashyq vagondardy aldyn ala sańlaýlaryn bekitip, astyq tasymaldaý múmkindigin qarastyrý qajet.
