Kólik jáne kommýnıkatsııa mınıstrligi: jyl saıynǵy «Skýter» aktsııasynyń qorytyndysy shyǵaryldy
ASTANA. Qyrkúıektiń 6-sy. QazAqparat - Qazaqstan Respýblıkasy Kólik jáne kommýnıkatsııa mınıstrligi kóliktik baqylaý komıteti 2010 jylǵy maýsymnyń 1-i men tamyzdyń 31-i aralyǵynda sýǵa túsý kezeńinde ótkizilgen jyl saıynǵy «Skýter» jedel-saqtandyrý aktsııasyn aıaqtady, dep habarlaıdy QR Kólik jáne kommýnıkatsııa mınıstrliginiń baspasóz qyzmeti.
Aktsııanyń maqsaty shaǵyn ólshemdi kemelerdi qaýipsiz paıdalanýdy, respýblıkanyń sýlaryndaǵy kópshilik demalatyn aımaqtar men oryndarda adamnyń ómiri men densaýlyǵyn saqtaýdy qamtamasyz etý bolyp tabylady.
Ótken jylmen salystyrǵanda shaǵyn ólshemdi kemelerdi jáne olardyń turaqtaryna arnalǵan bazalardy (qurylystardy) paıdalaný erejesin, ishki sý joldary boıynsha júzý erejesin jáne kemelerdi qaýipsiz paıdalanýdy retteıtin ózge de normatıvtik-quqyqtyq aktilerdi buzýshylyq 25 paıyzǵa ósken.
Aktsııa aıasynda respýblıka boıynsha 367 tártip buzýshylyq anyqtaldy, ótken jyly 297 buzýshylyq anyqtalǵan bolatyn.
Bqul zań buzýshylyqtardyń saldarynan respýblıka bıýdjetine 1,4 mln. teńge aıyppul salyndy (2009 jyly - 1 mln. teńge). 116 shaǵyn ólshemdi kemeni paıdalanýǵa tyıym salyndy.
Quqyq buzýshylyqtyń negizgi sebepteri keme júrgizýshileriniń normatıvtik quqyqtyq aktilerdi bilmeýi, kemeni mas kúıinde basqarýy, sonymen birge qarapaıym qaýipsizdik erejelerin elemeýi bolyp otyr.
Tártip buzýshylyqtyń negizgi túrleri boıynsha, atap aıtqanda belgilengen tártippen tirkelmegen nemese tehnıkalyq baıqaýdan ótpegen, borttyq nómirleri joq, tıisti ruqsatsyz qaıta jabdyqtalǵan kemeni basqarý boıynsha - 181 fakt; osy kemeni basqarý quqyǵy joq adamnyń kemeni basqarýy nemese kemeni osyndaı adamǵa basqarýǵa berý boıynsha 99 fakt; shaǵyn ólshemdi kemeni paıdalaný erejesin buzýshylyq boıynsha 79 fakt anyqtaldy.
Osy aktsııany ótkizý barysynda kóliktik baqylaý komıteti óńirlerdiń turǵyndarymen saqtandyrý jumystaryn júrgizdi.
Budan bylaı sýdaǵy kólik oqıǵalarynyń aldyn alý maqsatynda QR Kólik jáne kommýnıkatsııa mınıstrliginiń kóliktik baqylaý komıteti sýǵa túsý kezeńiniń ashylýyna deıin shaǵyn ólshemdi kemelerdi qaýipsiz paıdalaný máselesi boıynsha demalys aımaqtarynyń, baza-turaqtardyń, shaǵyn ólshemdi keme ıelerimen saqtandyrý jumystaryn kúsheıtýdi josparlap otyr.
